ثلاجة سمير
ثلاجة صغيرة لا تحتوي إلا على أطباق الأرز باللبن، ومكمل غذائي لطفل، وزجاجات من المياه و"العيش الفينو" وقطعة جبن بيضاء، وقليل من الخضروات، مكونات صورة نشرها سمير محمد، البالغ من العمر 33 عامًا، يخبر فيها مستخدمي السوشيال ميديا، أنه يبيع طبق الأرز باللبن مقابل 5 جنيهات فقط، مع إمكانية توصيل الطبق مجانا لغير القادرين.
اضطر سمير، المقيم بعزبة النخل، إلى ترك وظيفته كعامل دليفري، بسبب عطل في الدراجة النارية "الفيسبا" الخاصة به، قبل أن يبدأ مشروعه الصغير: "كان لازم شغلانتين عشان معايا طفل وإيجار شقة، فقررت أنزل أشتغل في وسط البلد، أبيع لعب أطفال، بس الشغلانة مكنتش مجزية، فقولت أعمل رز بلبن، وفعلا في ناس طلبت مني، بس الأماكن بعيدة وفي ناس في محافظات".
يضيف سمير: "فكرة أني أبيع رز بلبن كانت حاجة تكلفتها على الأد، يعني مثلا 100 جنيه أجيب 3 كيلو لبن، أعمل بيهم 50 علبة"، موضحا أن المبلغ الذي يكلف به أطباق الأرز باللبن، يكسب من وراءه 250 جنيها: "حاجة مؤقتة تخليني أقدر أدفع الإيجار وأعدي الأزمة دي".
عائد الرجل الثلاثيني من الأرز باللبن، لم يكن مجديا في تحمل أعباء الحياة ونفقاتها، لكنه لا يزال متمسكا بالجنيهات القليلة التي يجنيها منه، محاولا تزويد دخله من خلال بيع لعب الأطفال: "مجابتش نتيجة علشان الناس اللي طلبت أماكنها بعيدة أوي، فنزلت على فيسبوك لو حد عايز رز باللبن".
يقول: "أنا محتاج الناس تساعدني وتشتري مني، علشان أعدي الأزمة اللي أنا فيها، لأني قاعد في شقة قانون جديد، وابني بياخد لبن مدعم، وبيصرف من الصحة 6 علب، لكن مبيكفيهوش، والعلبة بـ99 جنيه غير الكهرباء والنور".
لا يزال سمير يبحث عن عمل آخر، بجانب الأرز باللبن، كون بيع لعب الأطفال لا تعود دائما بعائد مادي: "ربنا يكرمني يوم و10 مبيجيش فلوس، لأن البلدية برضوا بتعمل حملات، فأنا محتاج مصدر دخل تاني".
وأنهى الشاب الثلاثيني حديثه، بالتأكيد على أنه يحتاج إلى عمل مؤقت، يمكنه من تصليح "الفيسبا"، حتى يعود إلى عمله في توصيل الطلبات مرة أخرى، وأيضا تجديد رخصة القيادة، حتى يستطيع مواصلة العمل على السيارة التي يعمل عليها.
تعليقات الفيسبوك