فك أعمال سحر
نيران تشتعل بالطعام وتحرق «العَفش» الحديث، وخيالات وأشباح تظهر فجأة تتراقص وتختفي، هكذا قضى عروسان شهر العسل، بمحافظة قنا، بين رعب وقلق، قبل ان يكتشفا أن والدة خطيبة العريس السابقة، قامت بهذه الأعمال السحر السُفلية لهما، ووضعتها أسفل «مفرش التسريحة» بغرفة النوم، وكتابة طلاسم لسحر أسود على أطباق «الصيني» داخل «النيش»، انتقاما من العريس بعد فسخ خطوبته بابنتها.
«العروسة من ليلة الدخلة وهي بتشوف العريس قرد، وكمان كانت بتشوف أشباح بتتحرك في الشقة وتخرج لها من الحيطان وبتحلم بأشباح بيغتصبوها ولما بتعمل الأكل كانت النار بتطلع لحد السقف وكانت بتقعد على باب الشقة بترفض تدخله وراحت قعدت في بيت أبوها»، هكذا بدأ محمد العمدة عبدالحميد، معالج بالقرآن الكريم، يحكي ما حدث مع العروسين، حيث تدخل لمساعدتهما بدون مقابل، بعدما طافا على «الدجالين» لحل أزمتهما دون جدوى، «الدجالين مقدروش يساعدوهم وكانوا بياخدوا منهم فلوس وأنا حبيت أساعدهم بدون مقابل مادي لله».
واكتشف «محمد»، أعمال سحر أسود وطلاسم مدونة على ورق موجود داخل غرفة النوم بمكان لا يمكنهم أن يروه، ومكتوب أيضا على أطباق الموجودة بـ«النيش»، «ده بيأكد إن اللي عمل كده حد قريب منهم عشان يدخل ويكتب حاجات زي كده أو حتى يقدر يوصل لأوضة النوم بالسهولة دي، واتضح أنها بنسبة كبيرة والدة خطيبة العريس الأولى لأنها قبل الفرح كانت عزمته على الغدا وقالتله عايزين نتصالح وبعدها العريس حس بمشاكل في المعدة لكن مركزش، والسيدة دي على علاقة قوية بجيرانه اللي بعتقد أنها اقنعت حد يدخل عند هما ويعملوا الأعمال دي خصوصا أن العروسين كانوا سايبين مفتاح الشقة للجيران لما سافروا الغردقة شهر العسل».
وقام المعالج «محمد» بقراءة آياءت القرآن الكريم على الزوجين، وذلك بعد اكتشاف هذه الطلاسم وفك سحرها، «العروسة والعريس مكنش عليهم أي حاجة ولا حتى مس من الجن لأني أول حاجة عملتها قريت عليهم هما الاتنين وكانوا كويسيين جدا، وبعدين بدأت أدور في البيت لحد ما اكتشفت الطلاسم».
وعقب قراءة القرآن، شعر الزوجان باستقرار وهدوء تام منذ 3 أيام، بعد فك السحر والشعوذة.
ويؤكد «محمد»، إنه يقوم بالتطوع لمساعدة جيرانه في فك أعمال السحر، وذلك من خلال آيات القرآن الكريم والقراءة عليهم، منذ 15 عاما، «مش باخد ولا مليم من أي حد كل ده لوجه الله واستقرار أهلي وجيراني»، مؤكدا أن أعمال السحر والشعوذة انتشرت كثيرا بآخر 5 سنوات داخل محافظة قنا، بسبب انتشار السحرة والدجالين بنسبة كبيرة.
تعليقات الفيسبوك