ارتفاع أسعار أجرة التوك توك والموتوسيكلات ذات المقاعد الجانبية، داخل مدينة طوخ، بمحافظة القليوبية، بعد تحريك أسعار الوقود مؤخراً، دفع أهالى المدينة إلى إطلاق مبادرة «طوخ أحلى بشبابها» لتوحيد الأجرة لتكون 5 جنيهات لجميع المناطق، مع ارتداء السائقين تيشيرتات خاصة تميزهم عن غير المشتركين فى المبادرة.
"محمود": مبادرة انضم إليها عدد من السائقين ويرتدون تيشيرتات خاصة لسهولة تمييزهم
قبل أسبوع بدأ محمود الجوهرى، مدرس لغة إنجليزية، فى مدرسة ثانوية، بالتحدث مع عدد من سائقى التوك توك والموتوسيكلات، بعد أن ازدادت الخلافات مع الأهالى حول ارتفاع الأجرة وتغيرها كل فترة، محاولاً تشجيع السائقين بطبع تيشيرتات خاصة بهم يرتدونها أثناء العمل: «الموضوع كان صعب فى بدايته عشان محدش كان موافق على أجرة ثابتة وتبقى 5 جنيه، بس قدرت أقنع 50 سواق وهحاول أقنع الباقى، موضوع التيشيرت حفزهم أكتر على المشاركة لأن أغلب الناس بتخاف من العمل الاجتماعى عشان ما تتكلفش فلوس زيادة».
نشر «محمود» أرقام تليفونات السائقين على صفحة جروب المدينة بموقع «فيس بوك»، لسهولة التواصل معهم تليفونياً من أمام المنازل، الخدمة التى تستهدف كبار السن والطلاب بعد بدء العام الدراسى الجديد: «إحنا معندناش لا ميكروباص ولا تاكسى، مفيش غير التوك توك والموتوسيكل، لازم كل واحد يحاول يفيد بلده ويبقى ليه دور اجتماعى، ورغم كل الصعوبات اللى بنواجهها فى إقناع الناس، فإن الخدمة لاقت استجابة وكل الناس بتتصل والشغل بقى كتير».
يحاول «محمود»، مع مسئولى إدارة المرور، ترخيص التكاتك والموتوسيكلات غير المرخصة والاستعانة بعدد من السيارات السوزوكى للاعتماد عليها بشكل أكثر فى التنقلات: «بنحاول نوفر وسيلة مواصلات آمنة للطلاب والأهالى وكمان نحضر لمبادرة تشجير فى الشوارع، كل شارع يجمع ونزرع شجر عشان نزين بلدنا».
تعليقات الفيسبوك