​

هناك بعض المدراء الذي يتمتعون بصفات متميزة ويحرصون على التعامل مع الموظفين بأسلوب جيد ومثالي، اعتقادا منهم أنهم بتلك الطريقة يحصلون على أفضل أداء لديهم.

ويقدم مصطفى خليفة، استشاري تطوير الأعمال، أفضل صفات المديرين على الإطلاق، الذين يجدون النجاح بكل سهولة بسبب طريقتهم كما يلي:

1- "يتكلم مع الناس على طول":

"بيهتم جدا بالتواصل الفعال، وأنه يستغل كل فرصة ممكنة أنه يتكلم مع فريقه سواء عشان يسمع منهم أو يقولهم الأحداث اللي بتحصل ويشرح لهم التوجه والرؤية".

2- مستقيم:

"دايما أفعاله متوافقة مع أقواله، وصريح وواضح حتى لو كانت الحقيقة صعبة".

3- دائما إيجابي:

"بيشوف الفرص حتى في وسط المشاكل، وبيفكر إزاي يستفيد هو والفريق بتاعه من أي مشكلة ويتعلم منها".

4- يفوض العمل:

"دايما بيدي مساحة للفريق بتاعه ويوكل المهام ليهم بعد ما يطمن أن عندهم القدرة أنهم يعملوها صح، بيعلم ويديهم المسئولية وبيثق فيهم".

5- يرحب بالتغيير:

"عنده استعداد للتغيير بمجرد ظهور فرصة للتحسن أو التطوير، وبيرحب بمناقشة الأفكار الجديدة".

6- لديه توجه:

"تقدر تعرف بسهولة التوجه بتاعهم، وده جزء من وضوحهم اللي بيعتبره وسيلة من وسائل التواصل مع الناس".

7- التركيز على الأولويات:

"بيعرف يحدد أولوياته وبيخلي الفريق كله شغال في نفس الأولويات لأنه بيشرح لهم ليه بيعملوا كده وبيتفق معاهم على الأولويات دي".

8- يحترم شغل المحيطين به:

"دايما بيعظم شغل الناس اللي معاه مهما كان بسيط وشايف أن شغلهم مفيد لبقية الفريق ومن غير مجهود كل واحد مكنش الفريق كله عمل شغله صح".

9- يلهم الناس ويشجعهم:

"دايما عنده القدرة على تحفيز الناس وتشجيعهم، وبيلهمهم بطرق مختلفة سواء بشغله قدامهم وأنه قدوه ليهم أو كلامه اللي بيشجعهم به أو توضيح مجهودهم قدام الناس".

10- عادل ومتوازن:

"معاملته للفريق عادلة ومفيش تمييز بين حد والتاني، كله بيتعامل معاملة جيدة، والتميز فعلا بسبب المجهود والشغل، ولما بينقد حد أو يوجه حد بيبقى بشكل متوازن جدا وحقاني".

11- يعترف بخطئه:

"مبيرميش الأخطاء على غيره وبيعترف بغلطه، وحتى لو الخطأ من شخص من فريقه مش بيوجه له اللوم بشكل عنيف، ودايما بيتكلم بصيغة الفريق مش بصيغة الأفراد".

12- دائما هادئ:

"مفيش انفعالات كتيره إلا في الضرورة معظم الوقت هادي حتى في وقت المشاكل، انفعالاته محسوبة وردود أفعاله منطقيه".

13- يطور من الأداء:

"دايما بيفكر إزاي يحسن من أداءه وأداء فريقه، وإزاي يتعلم ويعلمهم مهارات جديدة ويكتسب خبرات جديدة، دايما مدرب شخصي للفريق بتاعه وبيشتغل على نقاط ضعفهم ويطورها".