صورة أرشيفية
يمتلك بعض المدراء صفات سيئة، بعضها ممكن أن يتحملها المحيطون بهم وأخرى لا يستطيعون التعامل معها أو التطوير من أنفسهم.
ويقدم مصطفى خليفة، استشاري تطوير الأعمال، لـ"الوطن" بعض العلامات والصفات التي تدل أن المدير "فاشل"، موضحا أنه في حال كان يمتلك صفة أو اثنين فقط يمكن تحمله، بينما إذا كانت تتوافر به جميع الصفات، فيجب تجنبه، وفي أول فرصة عليك ترك العمل معه والانتقال مع مدير آخر سواء في نفس المؤسسة أو غيرها.
1- دائما في حالة عصبية أو "نرفزة":
"بيطلع عصبيته على الناس حوليه، مش عارف تحدد امتى بيهدى أو بيكون مزاجه رايق، ده بيخلي الفريق كله مشدود وفي حالة توتر دائم".
2- يرفض التغيير:
"يرفض أي تغيير حتى لو كان إيجابي ومن قبل ما يعرف الموضوع أو مميزاته، يقول (احنا طول عمرنا بنعملها كده.. هيا ماشيه كويس كده.. يعني كل اللي قبلنا مكانوش فاهمين)، دايما دي ردوده على أي مقترح ممكن يحسن أداء الشركة، وده بيمنع أي تطوير ممكن يحصل للفريق أو لأسلوب الشغل".
3- التحكم والسيطرة:
"بيحب يتحكم في كل شيء والناس ترجعله في الصغيرة قبل الكبيرة، بيزعل منك مش عشان عملت حاجة غلط لكن عشان مرجعتلوش، وكمان تعمل الحاجة بالطريقة اللي هو شايفها صح، طبعا ده بيقتل الطموح والابتكار ومبيديش مساحة للناس اللي تحتيه أنها تتعلم وتكبر".
4- ليس لديه رؤية:
"اللي بنبات فيه بنصبح فيه ومفيش أي رؤية للي ممكن يحصل قدام وإيه اللي محتاجين نعمله عشان نتماشى مع الأحداث اللي بتحصل، وده بيخلي فريقه يحس إنه شغال دون هدف ومش عارف هو رايح فين".
5- التكبر:
"دايما شايف نفسه صح وأنه مبيغلطش، وبالتالي أي رأي هتقولوا له مش هيسمعه، شايف نفسه اكترواحد فاهم في أي موضوع وحتى لو قلت حاجة هو مش عارفها هيغلطك فيها".
6- الخوف:
"رغم إنه متكبر لكن بيخاف من اللي تحتيه وخصوصا لو كفاءات وبالتالي بيحاول يكبتهم ويحبطهم عشان ميتقدموش وميتحسنوش وكمان ميبقوش باينين، وده بيمنع التطوير لأي حد في الفريق بتاعه".
7- يُجامل:
"بيحب ناس وبيكره ناس، وغالبا الحب والتفضيل ده مش مبني على الأداء أو الكفاءة ولكن مبني على سماع الكلام وقد إيه الأشخاص دول بيسمعوا كلامه، طبعا ده بيجعل جو الشغل سيء وأنك مش هتترقى أو تاخد منصب أحسن لو مكنتش من رجالته".
8- العناد:
"أنه مبيسمعش لحد غير الناس اللي هو بيحبها، وزي ماقلنا بيحبهم مش لأنهم الأكفأ ولكن لأنهم بيسمعوا كلامه، وبالتالي بيسمع كلامه هو وبس والناس اللي تقوله الله ينور وكلامك صح، وطبعا ده بيوصل أن المركب تغرق".
تعليقات الفيسبوك