صورة أرشيفية
يُعتبر الراتب من أهم الأشياء التي يبحث عنها كل الأشخاص في أي وظيفة، وهو ما يشغل تفكيرهم عند التقديم للعمل.
ويقدم مصطفى خليفة استشاري تطوير الأعمال، نصائح أثناء مقابلة العمل بشأن كيفية طلب راتب مناسب لك حسب رغبتك عندما يقوم الموظف بسؤالك "إنت متوقع تقبض كام"، كما يلي:
1. استعرض قدراتك
"قبل ما توصل للسؤال ده لازم تكون استعرضت قدراتك وذكرت مؤهلاتك عشان المرتب اللي هتطلبه يكون منطقي".
2. لا تبدأ بالسؤال عن المرتب
"حاول في نهايات المقابلة أنك تبتدي تهدي المناقشة عشان توصل أنه هو اللي يعرض عليك مش انت اللي تسأل".
3. جاهز بتقدير للمرتب
"تكون عارف السوق وسألت فيه، وهنا مش بنتكلم عن آخر مرتب ليك، ولكن الوظيفة اللي انت مقدم فيها تقديرها في السوق بكام، كمان لازم تعرف أن نفس الوظيفة ممكن مرتبها يتغير من شركة لشركة خصوصا الشركات الدولية بتختلف عن المحلية، ذاكر الوظيفة كويس وذاكر وضع الشركة عشان تبقى متحضر".
4. المرتب ليس فقط مرتبا شهريا
"فيه بدلات وبونص سنوي أو ربع سنوي حسب الشركات، وفيه ميزات أخرى زي التأمين الصحي أو بدل الموبايل والعربية وغيرها، لازم تحسب إجمالي المرتب والبدلات على مدار السنة كلها مش بس الشهري".
5. لو توجه لك السؤال حاول تقول تقدير "من.. إلى"
"يعني متقولش رقم معين، حاول يكون نطاق يعني رقم من وإلى أو في حدود كذا، ولازم تاخد بالك من انطباع اللي قدامك لما بتقول الرقم، وطبعا قول رقم منطقي بدون مبالغة لأن الموضوع مش فصال وخلاص، وارد جدا لو قلت رقم عالي أوي أنه ميتمش اختيارك في الأسماء المقبولة مبدئيا".
6. إذا توجه لك سؤال عن مرتبك لا تكذب
"قول الحقيقة حتى لو كان رقم قليل أو بعيد عن الرقم اللي انت محتاجه، وممكن تفسر ليه فيه فرق بين مرتبك الحالي وبين المتوقع بانك بتتحرك عشان الفرق ده أو أنك زودت مؤهلاتك وخبراتك في الفترة اللي فاتت عشان كده تستحق رقم أعلى".
7. عندما يعرض عليك مرتب لا ترد على الفور
"أيا كان المرتب اللي هيتقال حاول متبينش انطباع، اسمع وفكر ومش لازم ترد بسرعة ولا لازم ترد في نفس المقابلة، لو حسيت إنك عايز تفكر خد وقتك وفكر وقولهم أنك هتفكر وهترد عليهم، وخليك محدد هترد عليهم إمتى".
8. حافظ على حماسك واهتمامك أيا كانت المناقشة
"حتى لو محستش بقبول للمرتب اللي انت طلبته أو اتقال لك رقم أقل من توقعاتك حافظ على حماسك واهتمامك، ممكن لما تعرف باقية العرض لو البدلات أو البونص أو ممكن يجد جديد يخليك تغير وجهة نظرك".
9. في حال طلبوا منك مقابلة ثانية عليك إظهار حماسك لإثبات نفسك
"غالبا بيبقى فيه مقابلة فنية لحد متخصص في مجالك أو مع حد في منصب أعلى، خليك متحمس واظهر أنك عايز تثبت نفسك وتدي مبرر لمرتبك اللي انت طلبته لما تقابل الشخص الفني ده هيدي انطباع أنك واثق في نفسك وأنك عارف قيمة شغلك وخبرتك".
تعليقات الفيسبوك