9 نصائح لتجنب "أسفنة" زملاء العمل
هناك بعض الأشخاص في العمل الذين يشعرون بالغيرة تجاه زملائهم سواء لأنهم أفضل منهم أو يتمنون الحصول على مكانهم ما يجعلهم يقومون بأشياء تضر الشخص الأخر من خلال انتظار أي خطأ كما يطلق عليه الكثيرون "يأسفنك" لدى المدير.
ويقدم مصطفى خليفة استشاري تطوير الأعمال بعض النصائح لـ"الوطن" لضمان واجتناب عدم التعرض لأي "أذية أو أسفنة" كما يلي:
1- اعمل شغلك صح.. وصح جدا، دايما راجعه مش بس من وجهة نظر صح ولا لأ، كمان من وجهة نظر لو حد حابب يطلع فيه عيب ممكن يقول إيه.
2- إذا أخطأت في شئ اعترف به على طول وخصوصا لمديرك، عشان لو وصلتله بطريقة تانيه من حد غيرك هيبقى رد فعله اسوأ بكتير من لو عرفها منك.
3- نسق دايما شغلك مع مديرك، اسأله هو محتاج إيه وعايز إيه بالظبط عشان تبقى دايما ماشي على الخطوات المظبوطة.
4- دايما تخلي تواصلك مع مديرك وزمايلك بشكل مباشر، متخليش فيه وسيط بينك وبين مديرك عشان ميتنقلش كلام غير اللي تقصده أو ميوصلكش كلام غير اللي اتقال فعلا.
5- خلي دايما تواصلك بشكل مباشر مع صاحب الطلب أو المشكلة، حتى لو جاتلك حاجة على لسان حد حاول تتواصل مع اللي قال بشكل مباشر وأفهم منه أكتر.
6- متصدقش كل اللي بيتقال ومتقولش كل اللي في دماغك، لازم تحط فلتر وإنت بتسمع وكمان وإنت بتتكلم.
7- متتكلمش في ضهر حد وهو مش موجود، لو عندك مشكلة مع حد أو عايز تنتقد حد بلاش يبقى على الملأ، عايز تنصحه إنصحه بينك وبينه.
8- لو حد اتكلم عن حد وهو مش موجود متتجاوبش معاه، لأن زي مابيتكلم عن حد معاك بيتكلم عنك مع حد تاني.
9- لو حصل ولقيت مديرك زعلان منك احتوي الموقف ومتجادلش وحاول الأمور متكبرش، وممكن بعد ما تهدى وهو يهدى تشرح موقفك وتبين إيه اللي حصل.
تعليقات الفيسبوك