الوحدة
يفضل كثيرون الوحدة أو التواجد مع عدد قليل من الناس، وغالبا ينظر إليهم الآخرون على أنهم مكتئبون أو منطوون، إلا أنهم لا يشعرون بالوحدة مثل ما يعتقده البعض.
وقال مصطفى خليفة، استشاري تطوير الأعمال: "من الصعب جدا أنك تصاحب حد فيهم، لأنهم بينتقوا أصدقائهم بشكل معقد"، مضيفا أن هؤلاء الأشخاص تواجدهم بصحبة أنفسهم يجعلهم يشعرون بالراحة ويفكرون بشكل أفضل، لذلك يفضلون الجلوس بمفردهم.
ويقدم خليفة الصفات التي تميز الأشخاص الذين يحبون الوحدة:
1. الولاء
عشان هما مش بيسعوا للأضواء بيبقى عندهم حب شديد لغيرهم ده في حالة أنهم قبلوه كصديق، هما عارفين قيمتهم كويس وبالتالي بيعرفوا قيمتك في حياتهم وده بيبقى في كل العلاقات عمل أو صداقة أو أسرة.
2. عقلهم منفتح
عشان بيحبوا صحبة نفسهم بيبقى عندهم الوقت أنهم يفكروا في أخطائهم وإزاي يصححوها، وبالتالي بيبقوا منفتحين لأي إفادة أو نقد أو اقتراح.
3. لديهم عزيمة
لما بيواجهوا صعاب أو مشاكل بتبقى عزيمتهم واضحة لأنهم خدوا وقت وفكروا في اللي بيعملوه كويس، ممكن يحسوا أنهم مضغوطين بس مبيضيعوش وقتهم في أي حاجة تلهيهم وبيركزوا إزاي يحلوا الموقف اللي هما فيه.
4. فهمهم لنفسهم بشكل صحيح
ناس كتير بتخاف من مواجهة مشاعرها عشان كده بيتأخروا في اتخاذ قرارات كتير وأوقات بياخدوا القرارات الغلط، الأشخاص اللي بيحبوا الوحدة بيبقى عندهم وقت أكبر يفكروا فيه مع نفسهم ويحللوا أخطائهم ويعاتبوا نفسهم ويطلعوا بالدروس المستفادة، أكيد أوقات بيحصلهم إحباط، بس بيبقوا أسرع في اجتياز المراحل الصعبة.
5. بيقدروا الوقت
أهم حاجة بالنسبة لهم الوقت، بيحترموه ويقدروه، أهم عناصر النجاح في الحياة هو إزاي بندير وقتنا ونستغله، نادرا ما يتأخروا، مبيضيعوش وقت حد، ومبيسمحوش أن حد يضيع وقتهم.
6. عارفين أن مفيش حد كامل
مع تحليل المواقف المختلفة والأشخاص بيكتشفوا الحقيقة أن مفيش حد كامل، كل واحد ليه مميزاته وليه عيوبه، عشان كده بدل مايضيعوا وقت في إزاي فلان عمل كده بيفكروا إزاي نتعامل معاه وإزاي ننصحه.
7. متعاطفين جدا
عشان عارفين نفسهم كويس وعارفين إيه الجوانب العاطفية ليها، بيفكروا للناس بنفس الطريقة عشان كده بيبقوا أقدر في الإحساس بمشاعر الناس حواليهم وإزاي يتعاملوا معاهم وبيبقوا صادقين جدا في تعاطفهم.
تعليقات الفيسبوك