العمل
يتمتع بعض الأشخاص بصفات استثنائية تؤهلهم للوصول لمناصب قيادية أو يستطيعون البدء في عمل خاص ويكونوا رواد أعمال.
مصطفى خليفة استشاري تطوير الأعمال، يقدم 7 صفات إن وجدت لديك فاعلم أنك مؤهل لتكون قائدا أو رائد أعمال ناجح، والتي تظهر من خلال العمل وتؤثر على نظرتك للأمور.
1. يقول ما يفكر فيه
الأشخاص اللي مبيقدروش يمسكوا نفسهم، اللي بيشوفوه بيقولوه لأن أهم حاجة عندهم تحديد المشكلة، عشان كده أول ما بيجدوا مشكلة بيحددوها ويعرفوها بكل وضوح، وممكن ميهتموش إنهم يراعوا ناس موجودة في اجتماع وهما بيوضحوا وجهة نظرهم.
الطبع ده بيساعدهم إنهم يحلوا مشاكلهم أسرع لأنهم بيعترفوا بالمشاكل بسرعة حتى لو كانت بسببهم، وأول طريق الحل هو الاعتراف بالمشكلة، بس طبعا بيزعل منهم ناس كتير لصراحتهم الزيادة.
2. يملأ أي فراغ
لما يكون في حاجة لازم تتعمل حتى لو مش مسؤوليته بيتطوع بسرعة إنه يعملها، وممكن يتحمل مسؤوليتها من غير ما حد يطلب ومن غير ما يسأل هي مسؤولية مين، ده أوقات بيزعج الناس لأنهم بيحسوا إنهم بيتدخل في اختصاصاتهم.
3. بيرفع سقف التوقعات
دايما بيسعي لتقديم أفضل ما عنده، عشان كده بيجتهد جدا وبيبقى مثال لغيرهم في المجهود، وبيرفع سقف التوقعات من المديرين لأن ببساطه عند مقارنة شغله بالأخرين الفرق هيبان، وده بيسبب مشاكل لأن بعض الزملاء هيعتقدوا أنه بيتحداهم أو عايز يظهرهم في موقف مش مناسب ويحطوهم تحت ضغط، مع إن ده بعيد تماما عن الحقيقة، لأن هدف الأشخاص دي إنهم ينجزوا مهامهم بأكمل وجه بعيدا عن أي منافسة أو مقارنة.
4. بيهتم بسؤال.. ليه؟
مش بس الأشخاص دي بيهتموا إن المهام تخلص، لأ بيسألوا ليه سواء حاجة إيجابية حصلت أو سلبية، لأنهم دايما عايزين يعرفوا الهدف من كل شيء بيعملوه ويتعملوا منه ويحسنوه، وكمان عايزين يعرفوا الأسباب فيستغلوها للأفضل لو كانت إيجابية، ويعرفوا يحللوها ويصلحوها لو كانت سلبية، أوقات بيتفهموا غلط لأنهم بيسألوا كتير أو طريقتهم فلسفية زيادة عن اللزوم.
5. بيحب الجدال
مع إنها صفة مش كويسه أوي، بس معظمهم بيجادلوا، مش عشان الجدال لكن عشان يوصلوا لأفضل شكل ممكن أو أفضل نتيجة ممكنة، وأوقات الجدال ده بيساعدهم ياخدوا قرار أو يقتنعوا أكتر بفكرة، ويخليهم يبتكروا ويفكروا بره الصندوق، طبعا بيسببوا إزعاج لزملائهم وأوقات لمديرينهم لأنهم مش بيسمعوا الكلام، جدالهم كتير ونقاشاتهم اكتر.
6. بيهتم بالنجاح أكثر من الأشخاص
دايما بيخاف من الفشل أكثر من خوفه من عقاب حد أو أنه يرضى حد. وده بيخليه يسعى أكتر للنجاح لأنه متحفز أكتر، وعدم خوفه من الأشخاص بيتفهم أوقات غلط هو مش مهتم برأي مديرينه أو زملائه، الحقيقة اهتمامه بالنجاح ورفضه للفشل أهم عنده بكتير.
7. الإيمان بأن السياسه الداخلية مضيعة للوقت
كل الشركات والمؤسسات بيبقى فيها سياسة داخلية، لكن هما بيركزوا إنهم يحققوا أعلى المراكز بمجهودهم وشغلهم، ومش بيهتموا بإنهم يلعبوا سياسة. تركيزهم أكتر على شغلهم وإنتاجيتهم، وبيسيبوا شغلهم يتكلم عنهم، أوقات بيعتقد الناس إنهم متكبرين بس الحقيقة هما مش بيهتموا بالدخول في النزاعات والسياسات الداخلية عشان ميضيعوش وقتهم اللي بيعتبروه أغلى حاجة عندهم.
تعليقات الفيسبوك