أسوأ الصفات
«البخل والحقد والخيانة».. صفات سيئة يتسم بها بعض الأشخاص، ما يجعل المقربين منهم ينفرون، وغالبا يبتعدون عنهم مع مرور الوقت، لعدم القدرة على التطبع بشخصياتهم.
درجة تحمل الأشخاص للتصرفات السيئة تختلف من شخص لآخر، فميريام عيد تقول إنها لا تتحمل الأشخاص القُساة: «عمري ما بعرف أقسى على حد، بزعل أوي لما حد يهون عليه يسيبني زعلانة عادي».
أما سارة أحمد، فتقول إن «الحقد» أكثر صفة تبغضها في الأشخاص: «بحس الدنيا مش مستاهلة إن الواحد يحقد على حد»، وتضيف الفتاة العشرينية: «ببعد عن الناس دي.. بخاف من آذاهم».
«الخيانة» هي الصفة التي تكرهها أيتن رجب، حيث ترى الشخص الخائن لا يستطيع أن يحب أو يكون مخلصا لحبه: «لو صاحبة حد خاين مش هيبقى جدير بالثقة، لو قال أسراري لحد أو لو عرف إني مأمناه على حاجة وقالها، العلاقة بالنسبة لي تبقى انتهت، يعني صعب أرجع الثقة دي»، متابعة: «الخيانة مرتبطة بالثقة، لو اتهزت صعب ترجع، ولو رجعت مش هتبقى كاملة ومهزوزة وشك طول الوقت».
أما محمد ضياء، فيقول إنه يكره «التحوير والتصنع والمعايرة والطمع»: «التحوير ده أسوأ حاجة في الوجود، معنى كده إن الشخص مش كويس ومش سالك، وهيفضل يكدب في كل حاجة في الدنيا، وكل حاجة يعملها حوار، بيكون إنسان مزيف يعني»، أما «الطمع» فيأتي في المرتبة الثانية من الصفات السيئة التي يكرهها: «ربنا نهانا عنها، والشخص ده هيبصلك في كل حاجة في حياتك، ويتمنالك الوحش عشان يبقى أحسن، وممكن يوقعك في حاجات غلط عشان نفسه».
أكثر الأشياء التي تثير حفيظة محمد مجدي، من يكذب حتى في المواقف الصغيرة، يقول: «مش هبقى مصدق الشخص اللي بيتكلم، وكمان هفقد الثقة فيه، واللي بيكذب في مواقف هبلة أوي بحس إنه مريض».
تعليقات الفيسبوك