المضيف محمد عكر مع الركاب من محافظة الشرقية
«كرم الشراقوة».. طبع متأصل بسكانها، هكذا يعرفون بكرمهم الشديد وجدعنتهم، وهذا النموذج يتجسد في «محمد عكر» مضيف بإحدى شركات الطيران الذي «عزم الطيارة» عندما وجد أغلبية ركاب الطائرة من محافظة الشرقية مثله، حينها شعر بسعادة عارمة وقرر تقديم لهم جميع الخدمات الإضافية غير المطلوبة منه.
«أنا شغال في شركة أغلب شغلها حج وعمرة، ومعظمهم ناس كبار في السن في مرة كان في رحلة وتقريبا زمايلي أكترهم من الإسكندرية فكنت في رحلة وفي ركاب طلعين بيكلموا بلهجة الفلاحي شوية وأصحابي هرجوا جو الفرخة نشلها وراك».. هكذا بدأ عكر حديثه مع «الوطن»، عن كواليس هذه الرحلة تحديدا التي كانت عام 2019 أثناء فترة الحج وقبل انتشار فيروس كورونا حول العالم: «قولتلهم الناس دي شكلها شراقوة ولو طلعوا كده والله ليلتكه مش معدية وفعلا بنسبة كبيرة جدا أغلبيتهم طلعوا كده».
أخبر عكر ركاب الطائرة بأنه من سكان نفس المحافظة وأنه سيقوم بتنفيذ جميع مطالبهم وتقديم الخدمات لهم كما يرغبون: «قولتلهم بتهريج أي حد محتاج حاجة هنا يقولي بالعند في أصحابي أنا هعملكم كل حاجة انتوا عايزنها النهاردة والناس قعدت تهرج معانا»، وفقا لوصفه، وظل الشاب البالغ من العمر 26 عامًا يجلب لهم كل ما يريدون بشكل إضافي خارج المطلوب منه.
وبين «المياه والمشروبات الساخنة والعصائر والوجبات والبطاطين».. استمر ركاب الطائرة من محافظة الشرقية في طلب الكثير من الخدمات من عكر: «المتعارف عليه أن كل راكب بيبقى متحدد لي المشروبات والوجبات بس بيبقى في حاجات أكسترا متاح لي إني أطلع منها وقولت للسوبرفايزر بتاعتي دول من نفس محافظتي قالتلي ماشي وكانت لذيذة».
ولم يقتصر الأمر على ذلك فبالإضافة إلى أن عكر ظل يخدمهم طوال الرحلة وحتى قبل الوصول بدقائق، قرر أيضا مساعدتهم في الحقائب: «كنت بشيل معاهم الشنط ودي حاجة من عندي أنا ذوقيا، مش مطلوبة مني وفعليا أنا شلت كل الطيارة بجد وأنا عندي غضروف، بس كنت مبسوط بده وبدعائهم ليا».
ونشر عكر صور من هذه الرحلة عبر جروب Traveller experience الشهير بتجارب السفر ولقى منشوره آلاف الإعجاب والمشاركات كما هناك من كان يعلق بـ «يعني هو انت عزمتهم على حسابك» ورد الشاب العشريني على ذلك لـ «الوطن»: «الناس اللي استظرفت وشايفين إني مش عزمهم من جيبي، إني أكون مبسوط برحلة كل اللي فيها من أهلي واجيب للطيارة كلها وأي حد يطلب حاجة بعملها ولوحدي لأن اللي معايا كانوا شايفين إني بعمل حاجة إضافية فده الموضوع وما فيه وأنا مبسوط بده».
تعليقات الفيسبوك