بعد قضاء صدام كيلاني 145 ساعة تحت المياه، وتسجيله رقمًا قياسيًا جديدًا في موسوعة جينيس للأرقام القياسية، بأطول غطسة في التاريخ، يثير فضول الكثيرين معرفة كيفية استمراره نحو 6 أيام وممارسة حياته الطبيعية من أكل وشرب وصلاة ولعب ورسم.
أحمد الشيخ رئيس شعبة السياحة والفنادق بجنوب سيناء شرح لـ "الوطن"، كيف استطاع البطل المصري صدام كيلاتي الصمود لمدة 6 أيام تحت مياه البحر حتى يكسر الرقم القياسي العالمي ودخوله موسوعة جينيس للأرقام القياسية.
الطعام والشرب
"الأكل والشرب والنوم مفيش فيهم مشكله خالص".. هكذا وصف الشيخ إمكانية الأكل والشرب تحت المياه موضحا أن أي شخص حصل على كورسات غطس يمكن أن يتناول الطعام والشرب تحت المياه من خلال تمارين بسيطة: "مش صعب وفيه فيديوهات له وهوه بياكل تفاح ويشرب عصير".
النوم تحت المياه
النوم تحت المياه من خلال سرير عبارة عن أسلاك ويتم تثبيت بها النفس أثناء النوم: "بيكون لابس حاجه اسمها full face mask بيتنفس منه عادي جدا، والأسطوانات مش بتخلص لأن فيه مساعدين له على مدار الـ24 ساعة بيساعدوه وبيغيروا عليه بحيث على مدار الساعة فيه جنبه كذا غطاس".
البرد في المياه
يتردد كثيرا سؤال كيفية تحمل المياه الباردة؟، ورد عليه الشيخ بأنه كان يرتدي بدلة يطلق عليها dry suit التي تمنع دخول ووصول المياه لجسمه وبالتالي تحافظ على حرارة الجسم طول الوقت.
التنفس من الأسطوانات وتسمم الأكسجين
شرح الشيخ طريقة التنفس تحت المياه قائلا: "هو الحقيقة مش بيتنفس غير هواء عادي زي اللي إحنا بنتنفسه مش أكسجين بنسب عالية بس الفرق أنه بيكون مظغوط علشان التنك ياخد كميات كبيره ده أولا، ثانيا بقى الغطسة كلها تمت على عمق من 5 إلى 6 أمتار ومش ده العمق اللي يحصل منه تسمم أكسجين لو كان الغطاس بيتنفس أكسجين بنسب أعلى من الطبيعي يعني 40 أو 50 أو حتى 100%".
كيفية قضاء الغطاس حاجته تحت المياه
بالنسبة للبول يكون عن طريق أمرين بحسب وصف الشيخ: "حاجه من اثنين أبسطهم البامبرز والثاني نظام خاص بالبدلة بيمكنه إنه يعمل حمام عادي وبيخرج البول خارج البدلة".
أما البراز يكون الغطاس طول الفترة بيعتمد في الغذاء على مشروبات الطاقه التي تعطيه السعرات اللازمة ليقوم بنشاطه اليومي: "والإخراج بتاعها بيكون سهل في صورة بول أو عرق أو بخار ماء"، وفقا لقول الشيخ.
وأنهى الشيخ حديثه بأن المدة تحت المياه كانت طويلة لذلك يجب أن يكون هناك وسائل ترفيهية: "منها الرسم وناس تنزل تلعب معاه وتسليه وناس حواليه وهوه بيقرأ الموضوع محتاج عزيمة وإرادة عشان يكمل".
تعليقات الفيسبوك