بتكلفة 300 جنيه، بدأ محمد عبدالرحمن، طالب في الفرقة الثالثة بكلية الآداب قسم جغرافيا، مشروعه "هاند باج قهوة"، يتجول بها داخل شوارع الإسكندرية لأكثر من 10 ساعات يوميًا، بحثًا عن عشاق القهوة، ليقدم لهم كوبًا مقابل 5 جنيهات.
"كنت شغال في كافتيريا لحد ما فيروس كورونا انتشر وقفلت ومبقاش عندي شغل أكل منه عيش وفكرت أعمل مشروع يجيب لي فلوس، وده المجال اللي بفهم فيه والقهاوي كانت مقفولة فبقيت بنزل ألف في الشوارع"، بحسب "محمد"، وبدأ في هذا المشروع في شهر مايو الماضي: "الهاند باج اشتريتها بـ200 جنيه والسبرتاية والكوبايات والبن كل ده عمل 100 جنيه، مشروع بسيط بس محتاجة برضه صنايعي بتاع قهوة شاطر عشان أنا بربي زبون عندي مش مجرد مشروع وخلاص".
رغم بساطة مشروعه فإنه مُرهِق بدنيًا؛ لتجوله في الشوارع لساعاتٍ طويلة: "الفلوس اللي بتيجي بتغطي مصاريفي ومقدرش أركب مواصلات عشان رزقي ميقلش وبفضل ماشي في الشوارع على رجلي وأقابل زبايني أعمل لهم القهوة في 3 دقايق، واضحك معاهم شوية وآخد أجرتي وامشي"، وفقاً لـ "محمد".
وعلى الرغم من فتح المقاهي مجددا بعد اتباع الإجراءت التي أعلنه مجلس الوزراء، فإنه اعتاد على العمل بمفرده يدير ويرأس مشروعه الخاص، وحقق مشروعه نجاحاً ملموساً: "مين في مصر مش بيحب القهوة خصوصاً لو كانت مظبوطة وعلى نار هادية والتركاية بتاعتها أنها تتعمل مياه ساقعة ونسيب البن يستوي براحته والوش يطلع مظبوط"، وبحسب "محمد"، لم ينوِ الاستمرار به، ويفكر في العمل بمجال دراسته الجغرافيا فور تخرجه: "ولو مالقتش شغل هرجع أبيع قهوة من تاني لحد ما ربنا يكرم ويفرجها عليا وممكن اشتغل شغلانتين مع بعض واكفي مصاريفي وعمري ما اتكسفت من مشروعي بالعكس أنا مثال لأي شاب مش بيدور حتى على شغل".
تعليقات الفيسبوك