«مفيش أفضل من إنك تبقى متطمّن على صديقك الأليف إنه خالى من أى أمراض، خاصة السكر، وعشان كده بنوفر له فحوصات وتحليلات مجانية»، حملة أطلقتها عيادة بيطرية فى منطقة بولاق الدكرور، تستمر لمدة 3 أيام، للمهتمين بتربية الكلاب والقطط، لإجراء الفحوصات اللازمة، للاطمئنان على صحة الحيوانات من السكر «أبو الأمراض».
يستقبل الدكتور سامح مراد، طبيب بيطرى، الحيوانات داخل عيادته من السادسة مساءً حتى العاشرة مساءً، ويكون الكشف وإجراء تحليل سكر الدم بالمجان: «أى حيوان معرَّض إنه ييجى له نفس الأمراض اللى بتيجى لنا، والسكر تحديداً لو ما اكتشفناهوش من الأول هيأثر على صحة الحيوانات وهيضر باقى أعضاء وأجهزة الجسم».
"سامح": ننصح المربين بالابتعاد عن السكريات والمياه الغازية
هناك أعراض كثيرة لهذا المرض، منها التبول بكثرة والعطش وفقدان الشهية ونقصان الوزن بشكل ملحوظ: «الأعراض دى ممكن تكون مشابهة مع أمراض تانية بتيجى للقطط بالذات، فعشان كده لازم يكون فيه متابعة أولاً بأول، وهناك أيضاً أدوية مخصصة لمرض السكر لدى الحيوانات، ونصائح مهمة للتعافى سريعاً، كالابتعاد عن السكريات والمياه الغازية، وده غلط جداً خصوصاً فى فترة إصابتها».
خلال فترة الحملة، يتم فحص الحيوان جيداً، من خلال الكشف على الرئة للتأكد من قدرته على التنفس بطريقة طبيعية، وكذلك المعدة والقلب والجلد أيضاً، للتأكد من خلوه من أى عدوى أو بكتيريا أو حشرات قد تصيب الجلد، وحسب «سامح» فإنه أطلق هذه الحملة مجاناً، وهى تقدم لأول مرة على مستوى الحملات والقوافل البيطرية: «الحملة وجدت إقبالاً كبيراً وتفاعلاً من مربّى الحيوانات»، لافتاً إلى أنها لا تقتصر على الحيوانات التى تُربى فى المنزل، بل أيضاً للحيوانات الضالة فى الشارع: «اتفاجئت إنه فيه ناس كمان مهتمة إنها تعمل فحص لحيوانات الشارع، وفى الحالة دى بنعالجهم كويس جداً وبنرجعهم للشارع تانى، ولو ظهر عندهم حالات مرضية بنودعها فى أى شلتر لمتابعتها ورعايتها».
تعليقات الفيسبوك