«هشام» أمام عربة الفول والطعمية وبجانبه اللافتة
«من لا يملك الطعام، يطلبه مجاناً، فهذا رزق من عند الله»، دعوة أطلقها «هشام» بعد أن رآها فى أمريكا وألمانيا، فقرر أن يطبقها فى مصر، حتى لو كانت من خلال عربة ساندويتشات «فول وطعمية».
علق ورقة على العربة تدعو المحتاجين لطلب الطعام: «الناس دلوقتى عايزة اللى يحس بيها، خصوصاً لو محتاجين، ويحسسهم إن لسَّه الدنيا بخير، وإنهم يستاهلوا الأحسن، وأنا فكرت أقدم ساندويتشات مجاناً للمحتاجين، وأحس إنى ساهمت بأى شىء فى خدمة المجتمع».
منذ 20 عاماً يعمل «هشام» على العربة، لكنه أطلق فكرته الخيرية حديثاً، من قرابة 5 أشهر، ولاقت إقبالاً شديداً، من الفقراء الذين ينتفعون بالطعام مجاناً، كما ضاعفت زبائنه ومكاسبه: «ممكن البعض يستغلنى، لكن الحقيقة إن مكسب الخير دايماً أكبر من أى فلوس، بدليل إن رزقى زاد الضعف».
يتردد الفقراء على عربة «هشام» على مدار اليوم، لكن الإقبال يزداد مع أذان المغرب، يلتفون حول العربة، ويطلبون الوجبات المجانية، الأمر الذى يسعده ولا يشعر بأدنى إرهاق: «بنبسط لما أشوف الناس قاعدين جنبى، ونظرة الشبع والرضا فى عيونهم، دى عندى بالدنيا، وفيه ناس بييجوا متأخر بعد نص الليل، وبيكونوا هيموتوا من الجوع، وبيمشوا وهمّا راضيين، وباحس إن أى خير بعمله بيترد لى فى عيالى، وبتتحل أى مشكلة تواجههم من حيث لا أحتسب».
تعليقات الفيسبوك