حالة من القلق والذعر يعيشها أهالى منطقة ترعة السواحل بإمبابة بسبب إطفاء أعمدة الإنارة ليلاً، مما قد يؤدى إلى انتشار الجريمة، خاصة مع حلول فصل الشتاء، الأمر الذى دفع الكثير من الأهالى إلى تقديم شكوى إلى الحى لحل الأزمة.
أحمد خميس، أحد سكان منطقة إمبابة، يروى أن جزءاً من أعمدة الإنارة يضىء نهاراً، والباقى لا يضىء: «فيه جزء صغير بنلاقيه منور فى الفجر، والباقى مش شغال، لا صبح ولا ليل، الدنيا بتكون عتمة، بنخاف على أولادنا إنهم يتخطفوا، المنطقة مليانة بلطجية وديلر مخدرات، بنسمع كل يوم والتانى عن حادثة».
الأهالى: نخشى من انتشار الجريمة خاصة مع حلول الشتاء
وحسب «خميس»، فإن أهالى المنطقة قدّموا بلاغات لشركة الكهرباء أكثر من مرة، لكن ما زالت الأزمة موجودة على أرض الواقع: «فى كل مرة كان بيتقال لنا نبلغ الحى، الحى جه عمل لنا إنارة جزئية للمنطقة، وبعد كده رجع الوضع زى ما كان قبل كده». خطف، تحرش، سرقة، امتلاء الشوارع بـ«ديلر» المخدرات ليلاً، أبرز المخاوف التى تسيطر على الأهالى بالمنطقة، وحسب صلاح شوقى، أحد سكان منطقة المطار بإمبابة، فإن زوج ابنته تعرّض لحادث سرقة بسبب انتشار الظلام بالمنطقة: «جوز بنتى اتسرق منه التليفون المحمول وهو راجع البيت، طلعوا عليه ناس على موتوسيكل وثبتوه وماكانش شايف حاجة، إحنا بنخاف ننزل بناتنا بالليل بنخاف عليهم من التحرش، وإن حد ممكن يتعرض ليهم بأى أذى».
ويشكو «شوقى» من ندرة وجود أعمدة كهرباء رغم حلول الشتاء: «الليل فى الشتا بيكون طويل والدنيا بتضلم فى الشوارع من بدرى، من الساعة 5 ونص بيبدأ الليل يدخل، علشان كده نفسنا المشكلة دى نلاقى ليها أى حل ينقذنا من الضلمة دى».
تعليقات الفيسبوك