الطفل هانى هلال
يلقبه أهالى مركز الحامول، بمحافظة كفر الشيخ، بأسرع وأصغر ميكانيكى على مستوى المحافظة، فرغم صغر سنه وضآلة جسده يمكنه تصليح السيارات وعربات التوك توك فى مدة تقل عن الساعة.. هانى هلال، الشهير بين أصدقائه فى المهنة بـ«صلصة»، طفل لم يكمل عامه الـ12، قرر أن يكافح من أجل أن يوفر نفقات المعيشة لأسرته: «اسمى ليه صيته فى المنطقة، بحب مهنتى جداً وبكتسب فيها خبرات جديدة».
كلمة «بلية» خُلقت من أجل أن يوصف بها «صلصة»، جسده الصغير لا يعوقه عن إنجاز عمله فى وقت قصير وبمهارة كبيرة: «أنا حركتى سهلة بسبب جسمى الصغير، فيه ناس كتير بتشوف إنى كده مش عايش سنى لكن أنا مبسوط جداً وبسرق وقت أعيش فيه سنى، فرحان إنى مسئول وقادر أساعد أبويا، وهو فرحان بيّا».
يحاول «صلصة» التنظيم بين عمله وبين دراسته فى الصف السادس الابتدائى: «أنا عندى ٥ إخوة بساعد أمى على توفير مصاريفهم، وفى نفس الوقت أنا شاطر فى المدرسة، بحاول أنظم بين الاتنين، والمدرسة متفهمة جداً لظروفى، لأنى من شغلى بوفر مصاريف أسرتى ودراستى»، 8 ساعات هى المدة التى يقضيها «صلصة» داخل الورشة التى يعمل بها، وبحسب صالح جاد الله، صاحب الورشة، فإنه يفاجأ عند ذهابه للورشة، ليجد «صلصة» يشاهد فيلم كارتون يسرق بعض الوقت ليرضى طفولته الضائعة: «صلصة بيحب جداً ركوب العجل، أنا بسيبه على راحته وبضحك لما ألاقيه مشغل فيلم كارتون فى الورشة».
القبول سمة يتميز بها الميكانيكى الصغير جعلت صاحب الورشة يتمسك به: «أعرفه من سنة، من قبل ما يشتغل معايا كان بيشتغل فى ورشة كبيرة اتعلم فيها كل أصول المهنة، الزبون اللى بييجى يصلح هنا، ويتعامل معاه مرة، بييجى تانى حباً فيه وفى شغله».
تعليقات الفيسبوك