التأخير عن موعد العمل
بين "راحت عليا نومة والطريق كان زحمة والكاوتش ضرب".. تعددت اعتذارات الموظفين للمديرين بسبب تأخيرهم عن العمل ولكن هناك بعض المبررات التي لا يقتنع بها المدير ويراها نوعا من الاستهتار.
وعلى جانب آخر، هناك بعض المديرين الذين يضطرون الموظف لتقديم اعتذار ليس صحيحا لمعرفته أنه إذا قال الظرف الحقيقي، سيجد رد فعل سيئ وفقا لوصف أحمد سامي (28 عامًا) لـ"الوطن"، وهو يعمل في إحدى الشركات الخاصة: "يعني أنا لو قولت راحت عليا نومة للمدير هيصوت في وشي وهيخصم لي ويقعد يقول ما انت لو بتقدر المكان مش هيحصل كده".
الأمر الذي يجعل المهندس سامي يبحث عن سبب مقنع يخبر به مديره، رغم أنه لا يرغب في ذلك: "مش بإيدي إني مصحتش ومش ببقى عايز أحور بس فبضطر أقول سبب مقنع زي جدتي تعبت كده يعني ".
بينما يجد محمود حسن (35 عامًا) صاحب إحدى شركات الدعاية، أن هناك بعض الاعتذارات المرفوضة من الموظف لكونها تعتبر قلة تقدير واستهتار منه: "يعني إيه الدنيا زحمة ما كل يوم زحمة انت محترمتش شغلك ليه يعني ونزلت بدري".
ولكن يرى عمر أحمد (30 عامًا) وهو مدير في إحدى شركات العقارات، أن قول الصراحة حتى وإن كان ظرفا يعتبره الكثيرون استهتارا أفضل بكثير من الخداع والكذب: "أنا ممكن أحترم الموظف اللي محورش وأعدي الموضوع من غير خصم عن واحد بيحور وأحس بده".
وشرح محمد ضياء خبير التنمية البشرية، لـ"الوطن"، أسباب حالة العصبية والاستفزاز التي يشعر بها المدير بسبب بعض اعتذارات مرؤوسيه، قائلا إنه يراها عملية استهتار ويشعر بكذبه ولكن إذا شعر بمسؤولية الشخص الذي أمامه واقتنع باعتذاره كونه يعلم أنه مجتهد حينها لن يكون في ضيق.
وأوضح ضياء أن تكرار نفس الاعتذارات كل فترة سواء من "أنا عيان، ابني تعبان، مراتي كانت بتولد، تعبت إمبارح جامد، الدنيا زحمة، الريس كان بيعدي، المنبه مضربش وغيره"، أيا كان المبرر حتى وإن كان حقيقيا أو مقبولا من قبل المدير سيشعر باستفزاز لأنه سيجده استهتارا به وبالشركة، لأن من الممكن تجاوز الأمر في حال كان التأخير على يوم أو يومين وكذلك في طلب الإجازات.
ونصح خبير التنمية البشرية بتقديم الاعتذار بشكل يقتنع به المدير ولا يراك بشكل خطأ من خلال تجميل الكلام: "متقولش إنك راحت عليك نومة دبش كده جمل الكلام قول أنا كنت سهران بليل بشتغل واتسحلت في الشغل فنمت متأخر فصحيت متأخر"، بهذه الطريقة البسيطة سيغير المدير وجهة نظره.
وأوضح ضياء أن هناك كلمات في علم النفس قولها يغيِّر مفهوم الحديث مثل كلمة "بس": "لما حد يقولك انت شغلك حلو جدا بس، كلمة بس هنا بتخليك تلغي الكلام اللي قبليه وبتسمع اللي بعديه"، ولكن يختلف الأمر إذا كانت الجملة: "شغلك حلو جدا وزود على شغلك ده كمان"، بهذه الطريقة لن يجد الطرف الآخر مشكلة.
ولكن من الممكن استغلال كلمة "بس" في الاعتذار عن التأخير بطريقة ذكية تؤثر على العقل الباطن وفقا لوصف ضياء: "يعني تقول للمدير أنا النهارده جيت متأخر راحت عليا نومة بس عايز أقولك أنجزت لك حاجات في الشغل كتير" هذه الجملة تجعل عقل المدير يركز على الجزء الثاني ويلغي الأول.
ورد الشيخ الأزهري سعيد حسني، إمام وخطيب ومدرس بأوقاف القليوبية لـ"الوطن"، عن هل يجوز قول عذر غير حقيقي بسبب عدم اقتناع بعض المديرين؟ وهل ذلك يكون حراما؟ بـ"والله لو العذر ده حصل يبقى عادي مفيش فيها حاجة إنما لو تهرب هيبقى خلف للوعد وهذه آية المنافق، وعندنا في الإسلام أن المسلم إذا قال صَدَق فلا ينطق إلا بصِدق، وإذا قيل له صَدَّق ما يقال من أخيه ويقبل عذره".
وأضاف حسني أن على المدير تقبل عذر الموظف: "قال رسول الله التمس لأخيك من عذر إلى 70 عذرا فإن لم تجد فقل لعل له عذرا لا أعرفه، وحتى إذا أخطأ واعتذر فيجب على الإنسان أن يقبل العذر وأن يسامح، وسيدنا النبي قال من جاءه أخوه متنصلا من عذره فلم يقبله لن يشم رائحة الجنة".
وتابع حسني أن الأمر أيضا متعلق بالنية: "وأساس الأمر في النية يعني أنا لو اديتك موعد وأنا في نيتي خلف هذا الموعد من البداية هذا كذب بس، والمراوغة في الكلام على حسب الحالة، يعني أنا لو بقول للمدير تعبان عشان زميلى يطلع عينه في الشغل أو عشان معملش المهام المكلف يبقى حرام".
وأكد الشيخ الأزهري: "إنما لو فعلا أنا تعبان ولو حصل ظرف الجو مطر مثلا أو جالي ضيف ومعرفتش أسيبه فبشوف عذر مقبول يبقى مفيش حاجة، ونرجع لمرجوعنا إن الأمر مداره على نية الشخص والحالة اللى هو فيها".
وطرح حسني مثالا: "يعنى مش هيقدر يقول للمدير أنا سهرت طول الليل مع أصحابي ونسيت نفسى وتعبان جدا فقاله أنا تعبان جدا ورايح للدكتور فكذبه لم يضر أحد بس مش يقوله أنا عامل الشغل ومجهز كل حاجة وجاي ومعملتوش ده كذب".
وذكر مثالا آخر: "لو عندي ضيف وقلت أنا تعبان ومش قادر أجي والشغل مش هيتأثر ولا حد هيتضرر يبقى مفيش فيها حاجة عشان عارف إن أنا لو قلت للمدير عندي ضيف هيقولي طب اقعد جنبه انت مرفود إنما لو متفاهم ومش متعنت تقوله الحقيقة طالما مش هضر حد ومش هوعد واخلف وعدى خلاص".
تعليقات الفيسبوك