صورة أرشيفية
"الموقعاتي".. كلمة متعارف عليها بين الناس سواء في حياتهم الشخصية مع أصدقائهم أو داخل العمل بين الموظفين، وتكون عن شخص دائمًا يلعب دورًا سيئا، ويسعى لتخريب العلاقات أو كما يطلق عليها "التوقيع بينهم" لعدة أسباب.
ويقدم مصطفى خليفة استشاري تطوير الأعمال أسباب تجعل الشخص "موقعاتي" وكيفية اكتشافه والتعامل معه حتى لا يحدث لك مشاكل بسببه.
أسباب الشخص "الموقعاتي":
الأول:
"عندما يكون مدير ويحاول أنه يوقع ما بين الناس حتى يفرق ما بينهم، عشان زي ما بيقولو فرق تسد، يعني يفرق ما بين الناس عشان يبقى هو المتحكم في زمام الأمور".
الثاني:
"لما يكون زميل في الشغل وله مصلحة في التوقيع ما بين الزملاء وبعضهم، زي ما حد يوقع بينك وبين حد عشان تبقى محتاجله هو بس".
الثالث:
"لما يكون زميل في الشغل برده بس بيحاول أنه يوقع بينك وبين مديرك عشان يبقى شكلك وحش ويبقى هو الشخص الكويس بالنسبة لمديركم".
الرابع:
"لما يكون من بره الإدارة بتاعتك أو فريقك وبيحاول يوقع ما بينكم عشان مش عايز يبقى فيه ناس ناجحين وعايز يشوف بينكم مشاكل".
-كيفية اكتشاف الشخص "الموقعاتي" والتعامل معه
أولا:
لو لقيته بينقل أخبار أو كلام اتقال عنك، لازم بسرعة توقف تفكيرك في الكلام اللي بيتقال عليك وتبتدي تتعصب أو تتنرفز، وقف الكلام وحاول تتأكد فعلا أنه اتقال عليك من مصادر موثوق فيها أو عن طريق المواجهة المباشرة مع اللي سمعت أنه قال الكلام ده عليك ويفضل في وجود الشخص اللي نقل الكلام".
ثانيا:
" لو لقيته بيحاول يضايقك ويزود الكلام اللي بيعصبك، ده معناها أنه بيوقع وعايزك تخرج عن شعورك وتاخد قرار أنك تخاصم أو تعادي الشخص اللي بينقل على لسانه الكلام ده، هنا برده لازم تمسك اعصابك ومتاخدش أي قرار وانت متنرفز".
ثالثا:
"لو علاقتك بي اصلا مش كويسة ومش من المنطقي أنه يكون بينقلك كلام عشان مصلحتك، هنا لازم تراجع الكلام اللي بيقوله وتشوفه منطقي ولا لأ".
رابعا:
"لو لقيت لي مصلحة أنه يوقع ما بينك وبين الشخص اللي بيكلمك عليه، لازم تفلتر الكلام وتفهم غرضه إيه بالظبط من نقل الكلام، اسمع واسكت وحاول متكترش في الكلام وفكر فيه بعدين بطريقة موضوعية".
تعليقات الفيسبوك