8 نصائح لكسب المدير
يسعى الكثيرون إلى التقرب من مديرهم في العمل وجعله يحتاج إليه في جميع المهام بشكل إيجابي.
ويقدم مصطفى خليفة استشاري تطوير الأعمال بعض الخطوات التي تجعل مديرك "تحت دراعك" وفقا لوصفه.
1. لازم تتقن شغلك كويس جدا بحيث توصل فيه أنك محترف، وده معناه أنك وصلت لمرحلة أن لو أي حد محتاج حاجة في الجزء بتاعك هيكلمك عشان عارف أنك أشطر واحد.
2. الناس تعرف أنك شاطر، فيه ناس كتير شاطرة بس محدش عارف أنهم شاطرين، لازم تبين أنك شاطر سواء في الاجتماعات أو أنك تعرض شغلك أو إنك تساعد الناس.
3. تبقى سهل الوصول والتواصل، يعني الناس تعرف توصلك بسهولة وكمان ترد بسرعة على أي حاجه تتبعتلك، لما مديرك يحتاجلك يلاقيك.
4. ميتخافش منك، يعني الناس تحب أنها تتكلم معاك وتطلب منك، ميبقاش مديرك أو زملائك شايلين هم أنهم هيطلبوا منك حاجة.
5. تبقى يعتمد عليك، يعني ملتزم بمواعيد تسليم الشغل وتنفيذ الحاجات المطلوبة منك، وميبقاش مديرك قلقان أنك في معاد التسليم مش هتبقى مخلص حاجتك.
6. ليك علاقات كويسة مع اللي حواليك، وخصوصا الإدارات التانية، فلو مديرك حب يخلص حاجه مع إدارة تانية يلاقيك عارف فيها حد أو هتعرف تتصرف وتتواصل معاهم وتخلص شغلك.
7. تعرف تحل مشاكلك بنفسك، متبقاش مع كل مشكله ترجعله وانت مش معاك حلول، حاول تحل مشاكلك بنفسك وحتى لو رجعتله ترجعله للاستشارة ومعاك حل أو اتنين ومحتاج مشورته.
8. تكون مبتكر، يعني تعرف تلاقي طرق مختلفة لعمل الشغل، مش مع أول مشكلة تتعطل ومتعرفش تكمل، لازم تعرف تتصرف عشان تخلص شغلك.
تعليقات الفيسبوك