يعاني البعض من عدم التزامهم بالمواعيد مما يضعهم في مشاكل مع الآخرين، ويُقدم مصطفى خليفة استشاري تطوير الأعمال بعض الخطوات حتى لا يتأخر الشخص عن مواعيده، كما يلي:
أولاً: حسب وقت مشوارك لازم تكون عارف المشوار هياخد قد إيه، والأهم أنك تعرف هياخد وقت قد إيه في الوقت اللي أنت نازل فيه، لأن فيه طرق كتير بتختلف فيها الزحمة من وقت للتاني، يعني ممكن تكون بالليل فاضية عن الصبح أو العكس، فلازم تحسب طريقك هياخد وقت قد إيه.
ثانيًا: احسب أي وقت إضافي لوقت الطريق لو رايح بعربية لازم تحسب الوقت اللي هتركن فيه، خصوصا لو مشوارك في مكان صعب تلاقي فيه مكان للركنة، ولو رايح مواصلات لازم تزود وقت الانتظار لغاية لما تيجي المواصلله بتاعتك، وطبعا الوقت ده هيزيد لو بتاخد اكتر من وسيلة مواصلات، وحتى لو تاكسي، لازم تزود الوقت لحد ماتلاقي تاكسي.
ثالثا: احسب وقت اللبس لأن من ساعة ما تقرر تروح مشوارك هتبتدي تلبس، عشان كده الوقت ده هيتحسب معاك، عشان كده لازم تاخد بالك أنك تزود وقت مناسب.
رابعا: لو أول مرة تروح المشوار ده اعمل حساب التوهان لازم تعمل حساب الوقت اللي هتدور في على المكان ووارد تغلط أو تتوه شوية لحد ما توصل، ممكن تسأل كويس قبل ما تروح وتشوف المكان فين، وممكن تستخدم الخرايط عشان تقلل نسبه الخطأ.
خامسا، لو مقابلة أو اجتماع اعمل حسابك في 5 أو 10 دقايق تاخد نفسك فيهم مهم أوي تعمل حسابك خصوصا لو مقابله عمل أو اجتماع أنك تزود الوقت اللي هتاخد فيهم نفسك قبل ميعادك بعد ما توصل، مش كويس أنك توصل على معاد المقابله بالظبط.
سادسا: اعمل حساب أي ظروف خاصة وارد جدا أنك تلاقي ظرف زي مثلا أن القميص مش مكوي ولسه هتكويه، أو لو مشوار عائلي وفيه أطفال معاك، ده كفيل أنك تزود 15 دقيقة على الحسبة بتاعتك، احسب حسبتك وزود عليها 10 دقايق احتياطي لأي ظرف طارئ.
سابعا، لو حسيت أنك هتتأخر اتصل بالشخص اللي منتظر كتابع وقتك أول بأول ولو حسيت أنك هتتأخر مهم جدا أنك تتصل بالشخص اللي منتظرك وتبلغه بالمدة اللي انت متوقع تتأخرها، ده هيحسس اللي قدامك أنك بتحترم مواعيدك وبتحترمه كمان، وده هيخليه ميزعلش من التأخير.
تعليقات الفيسبوك