صورة أرشيفية
يعاني بعض الموظفون من عدم استطاعتهم على التأقلم مع المديرون أو كيفية جعلهم يثقون بهم ما يؤثر سلبا على نفسية الشخص.
ويُقدم مصطفى خليفة، استشاري تطوير الأعمال، بعض الخطوات والأشياء التي يجب معرفتها تمكنك من جعل مديرك يحبك ويعتمد عليك وتزداد ثقته تجاهك.
- مديرك زي أي حد في الدنيا .. زيك في شغلك عايز يعمل شغله مظبوط ويحقق الأهداف المطلوبة منه والنتايج المنتظرة منه، ولكن الفرق أنه بينفذ الكلام ده من خلال فريق عمل مش بس من خلاله، وهنا تيجي أهمية فهمي لدوري في فريق العمل بتاعي ومع مديري.
- عشان نبتدي صح لازم نفرق مابين دورك في شغلك، ودورك مع زملائك ومع مديرك، فمثلا في علم الإدارة بنفرق مابين إدارة شغلي ومشروعي وبين إدارتي لتوقعات المعنيين بالأمر stakeholders يعني أصحاب المصلحة واللي من ضمنهم زملائي وأهمهم مديري.
- أي مدير عايز من الفريق بتاعه أنه يعمل شغله على أكمل وجه، فبالتالي مهم جدا أنك لما تاخد أي مهمة عشان تنفذها أنك تفهمها كويس، وتسأل عن الهدف منها وإيه المطلوب فيها بالتحديد وإيه توقعات مديرك منها، عشان تعرف تنفذها صح وتحقق المطلوب منها وتتقبل من مديرك، حرفة السؤال وإزاي أوضح الاحتياجات وأفهم المطلوب أهم من حرفة التنفيذ.
- أثناء التنفيذ لازم آخد بالي إني لو مش هاعرف أنفذ الشغل أو وقفت في حاجة إني أرجع لمديري وأسأله، عشان معملش حاجة واخد فيها مدة طويلة وفي الآخر متبقاش المطلوبة، ممكن أعمل جزء من المطلوب وأوريهوله، واخد رأيه فيه بحيث أنه لو مش هو المطلوب أو المتوقع الحق اعدله من غير ما أضيع وقت كتير، ولو هو المطلوب اكمل فيه.
- لازم أعرف شخصية مديري، في مديرين بيحبوا يعرفوا التفاصيل micro-management وفي مديرين مبيحبوش التفاصيل ويحبوا يبقوا بيتكلموا بشكل استراتيجي أكتر، فلو مديرك من نوع محب التفاصيل لازم تديله تحديث كل شوية عن حاجات الشغل وخلصت إيه وفضلك إيه، وده هيبقى بالنسبة له حاجة كويسة ولو مرجعتلوش مش هيحس أنه فيه شغل وممكن يفقد ثقته فيك.
- أما بقى لو مديرك من النوع الاستراتيجي، هتحتاج تفهم منه المطلوب وتنفذه وترجعله بنتيجة، لو رجعتله كتير هيحس أنك مش فاهم شغلك لأنه بيحب يقولك التوجه والاستراتيجية ومبيحبش الدخول في التفاصيل.
- لما بتسلم الشغل لازم تاخد بالك من كام نقطة:
أولا: أنك تلتزم بالمواعيد المحددة المتفق عليها من البداية.
ثانيا: أنك تلتزم بالمطلوب عمله، ميبقاش فيه حاجة ناقصة.
ثالثا: متبديش اعتراض أو رفض لأي شيء بيطلب، لأنه بيطلبه لأسباب محددة، ولو مش عارف الهدف ممكن تسأل.
- الحاجات دي مهمة جدا لأن أكيد مديرك معتمد على شغلك في حاجات تانية، فلازم تساعده أنه يحقق أهدافه ولازم تبني ثقة بينك وبينه، ومع استمرارك في شغلك بالطريقة الصحيحة هيعتمد عليك بشكل أكبر وثقته فيك هتزيد.
تعليقات الفيسبوك