عمرو أديب وعمرو دياب
"هعمل فيديو وهنزلو وهوريك شغل المجانص والترابيس، وهوريك السمانات يا عمرو.. أنا هوريك يا عمرو يا دياب.. هوريك عمرو أديب في الجيم بتاعه.. أنا بصراحة مكنتش بحب أعمل الحاجات دي علشان العين، لكن عمرو لغاية اللحظة اللي إحنا فيها محصلش فيها حاجة لعمرو دياب.. وهو ضد العين وأنا كمان مش هخاف لأني كنت خايف أوري الناس قدراتي في الجيم بتاعي، وأنا أوعد جمهوري الحبيب وهجيب مخرج من برة يظبطني ويعملي شوية فوتوشوب".
كانت تلك آخر كلمات قالها الإعلامي عمرو أديب عن الفنان عمرو دياب حتى اليوم في حلقته أمس من برنامج "كل يوم"، المذاع على شاشة "أون لايف"، وجاءت كلماته هذه بعد أن قضى 5 دقائق كاملة من حلقة برنامجه أول أمس في "والحسد والحسرة" على عمرو دياب، بعد نشره فيديو وهو في صالة الجيم ويمارس تمارين قوية وصعبة، ويستعرض لياقته البدنية وقدراته الجسمانية".
وكان عمرو أديب في حلقته أول أمس قد بدأ حلقته وأذاع فيديو الفنان عمرو دياب، معلقا: "تصحى الصبح تفتح تويتر تلاقي الأستاذ عمرو دياب بينكد عليك رسمي.. تشعر إن إنت متوفي إكلينيكيا.. إن إنت أنتهيت ومالكشي لازمة وإن إنت قطع غيار وصيني.. أنا بقوم من السرير و4 بيقوموني والأستاذ عمرو دياب بيعمل حاجات يعجز عن فعلها أي حد في ريال مدريد.. صحة مفرطة.. والمفروض إننا سن واحد".
وتابع أديب: "بص السمانة.. بص الترابيس.. بص المجانص.. الأستاذ عمرو دياب بيقولنا ياصحة أوديكي فين.. الراجل صحته متفجرة.. يانهار أسود ومنيل.. واحد زيي ممكن يكمل إزاي في الحياه.. ليه يارب هو عمرو دياب وأنا عمرو أديب.. هو بس فرق الحروف.. لو كنت أنا عمرو دياب وهو عمرو أديب.. شعر وصحة وفلوس والبنات بتحبه، ورياضة غير طبيعية.. اللي بيعمله عمرو دياب ده يتحدى الحسد.. عمرو دياب بيقولي ياعمرو يا أديب موت بغيظك".
وأضاف أديب: "عمرو أخوك تعب.. أخوك معرفشي يعمل حركة من دول.. ليه ياعمرو كدا.. إيه الصحة اللي إنت فيها دي.. إيه التفاؤل والسعادة اللي إنت فيها دي".
ولم تكن تلك المرة الأولى التي لم يخجل ولم يتردد فيها عمرو أديب من إعلان الغيظ والحسد على "الهضبة" على الهواء، حيث تحدث عن الفنان عمرو دياب في برنامجه "القاهرة اليوم" على "أوربت".
وكانت تلك الواقعة بعد إصدار الفنان عمرو دياب ألبومه الجديد "عمرنا ماهيرجع زي زمان"، حيث قال: "عمرو دياب بقى عنده 26 سنة.. عمرو كل يوم بيصغر.. عمرو بيعمل أي شريط يحط فيه أي مزيكا بيخلص كله.. عمرو بيطلعله شعر وأنا شعري بيقع.. الراجل بيطلعله عضلات في وشه.. ده بيغيظني".
وفي فيديو آخر للإعلامي عمرو أديب في حلقة من برنامج "كل يوم"، المذاع على شاشة "أون لايف"، وبعد دخول عمرو دياب موسوعة جينيس: "أنا عندي مع عمرو دياب خلاف جذري.. عمرو دياب بيصغر وصحته بتكون أحسن، وبيتفوق أكتر وبيفضل جان وناجح وعبقري.. مفيش حسد بيأثر فيك.. يعني الصحة اللهم صلي على النبي تمام.. أنا في حياتي عاوزة أبقى عمرو دياب وعقدتي أبقى عمرو دياب".
تعليقات الفيسبوك