الدكتور هاني الناظر-صورة أرشيفية
حالة من الحزن تخيم على محبي الدكتور هاني الناظر، من أهله وتلاميذه والعديد من المرضى ومتابعي مواقع التواصل الاجتماعي، بعد إعلانه في منشور على حسابه الرسمي على موقع التواصل الاجتماعي «فيس بوك»، تعرضه لوعكة صحية شديدة، ستمنعه من الرد على المتابعين، ليكشف نجله الدكتور محمد هاني الناظر، في منشور آخر على حسابه الرسمي على «فيس بوك»، خضوع والده لعملية جراحية لم يكشف عن تفاصيلها.
وكتب الدكتور هاني الناظر، خلال منشور على صفحته أمس: «بعتذر لحضراتكم عن عدم قدرتي على استقبال أسئلتكم الطبية والإجابة عليها، ولا قدرتي على استقبال المكالمات التليفونية، بسبب مروري بوعكة صحية شديدة.. اسأل حضراتكم الدعاء وربنا يبارك في صحتكم جميعا ويحفظكم».
وانهالت التعليقات من آلاف المتابعين على المنشور، معربين عن تمنياتهم له بالشفاء العاجل.
وقالت إحدى المتابعين، اسمها مروة رؤوف: «حبيبي يا دكتور هاني قلبى وجعني على حضرتك، ربنا يطمئنا عليك يارب».
فيما قالت مها سالم: «ألف سلامة على حضرتك بعيد الشر عليك يا دكتور. نجل هاني الناظر الدكتور محمد هاني الناظر دون على صفحته الشخصية على فيسبوك، إن والده سيخضع لعملية جراحية صباح اليوم، طالبا الدعاء لوالده، قائلا: والدي دكتور هاني الناظر، في وعكة صحية شديدة جدا، وإن شاء الله داخل يعمل عملية الصبح، وحقيقي محتاج دعاءكم، ربنا يقومه بالسلامة ويعديها على خير».
نجلا هاني الناظر، شاركت منشور والدها، الذي أعلن عبره عن مرضه، وكتبت تقول: «ربنا يعافيه يا رب ادعوا لبابي لأنه دخل النهاردة المستشفى وتعبان جدا، كما قامت بمشاركة منشور شقيقها الدكتور محمد الذي أعلن خلاله عن خضوع والده الدكتور هاني الناظر لعملية جراحية بعد مرض شديد أصابه دون الإعلان عن تفاصيل هذا المرض.
وكان الدكتور هاني الناظر، شارك منشورا لابنته نجلا هاني الناظر منذ 5 سنوات، وكتب عليه شكر لابنته، التي عبرت خلاله عن الجانب الإنساني بحياة والدها، وعن تقديرها وفخرها بأبيها وبعمله الذي يقضي فيه ساعات طويلة بعيدا عن أسرته لخدمة المرضى، إذ قالت: «أنا نجلا هاني الناظر، بنت الدكتور هاني الناظر وأفتخر بدكتور الأمراض الجلدية المعروف.. حبيت بس أوصل رسالة لكل مرضاه. أولا ربنا يشفي كل مريض و يعافيكوا من أي سوء يا رب، ثانيا: حبيت بس أوضح الصورة كاملة للي مش عارف بابايا كويس، هو تعب كتير جدا علشان يوصل للي هو فيه دلوقتي ومازال بيتعب، هو راجل قلبه طيب وفعلا بيحب يخدم الناس وده واضح من خلال الجهد والوقت اللي بيبذله علشان يكتب للناس علاجات على الفيس بوك مجانا».
وتابعت: «لما بيطلب من الناس تبدأ السؤال بتحية، فده لحرصه على إنشاء علاقات طيبة بينه وبين الناس وكمان علشان ينشر الخُلُق الطيب ده بين الناس، فمش حاجة تعيبه أبدا بالعكس، أنا حبيت أقولكوا إنه فعلا بيرجع من العيادة بعد يوم متعب طويل ويفضل يرد على أسئلة الناس ويكتب علاجات وساعات يسهر لقرب الفجر، وبياخد كتير من وقت أسرته، اللي هو إحنا وأحفاده اللي بيحبوا جدا يلعبوا معاه، ومش بيقعد معانا علشان يساعد الناس المريضة ويكتبهلم علاج لعله يكون سبب في شفاؤهم، وبييجي على نفسه علشان مايتعبش الناس ويكلفهم ويخليهم ييجوا العيادة علشان يكتبلهم العلاج، ولو حد راحله العيادة ولاقاه تعبان أو متعصب شوية فده بيكون نتيجة الإرهاق الشديد اللي هو بيكون فيه».
وأردفت: «أوقات أخرى ممكن حد يروحله العيادة وهو علشان شاف المرض ده مليون مرة قبل كدة وسمع الأعراض دي كتير فبيكون خلاص مش محتاج يبص عليه بدقة وبيكتب العلاج بشكل مباشر، فالناس بتفتكر إنه بيكروت أو بيتكبر عليهم، لكن مستحيل يكون واحد بيسهر كل ليلة لكتابة علاج للناس ونقول عليه في نفس الوقت إنه بيكروت العيانين في العيادة اللي دافعين فلوس، لكن هو علشان راجل محترم و بيخاف من ربنا وعارف إنه هايتسأل أمام الله على كل مريض جاله، عمره ما بيكروت حد، وأكيد أنا بردو باعذر المريض التعبان اللي جاي من بلد بعيد أو قاعد مستني دوره من بدري ودافع فلوس الكشف علشان يتعالج، و دكتور هاني بردو بيكون حريص على المرضى بتوعه و بيحترمهم جميعا».
وختمت منشورها قائلة: «أنا بس بأكد لكم إن والله العظيم بابا راجل محترم وعنده ضمير وعمره ما هايكتب علاج من غير ما يشوف المرض وعمره ما هايكروت حد وعمره ما هايتكبر على المرضى، ورجائي إن إنتوا تصبروا عليه وتدوله أعذاره وقت تعبه أو لو كان أوقات عصبي شوية، زي ما هو بيصبر على الناس ويتحمل أذى البعض، وتقدّروا تعبه و تعب اي دكتور بياخد من وقته و جهده علشان يساعد في شفاء أي مريض، وشكرا على تقبلكم كلامي بصدر رحب وتاني».
تعليقات الفيسبوك