سماح فطيم الزغبي
رغم دراستها في كلية الآداب قسم مساحة بجامعة كفر الشيخ إلا أنها استطاعت أن تجمع بين الدراسة وبين موهبة الرسم، وحرصت على أن توظف موهبتها في إنتاج أفضل اللوحات الفنية والبورتريهات.
سماح فطيم الزغبي، 20 عاماً، طالبة بكلية الآداب، من مدينة برج البرلس، بمحافظة كفرالشيخ، تعشق الرسم منذ نعومة أظافرها، واستطاعت بأن توازن بين وقت الدراسة ووقت المذاكرة والرسم لتُصبح من أشهر الرسامين في محافظتها ومعروفة بين أصدقائها وزملائها في الجامعة.
«بدأت أرسم من وأنا صغيرة لأن الموهبة كانت عندي واخداها من ماما، وكنت بستخدم الألوان في الأول بس بعد كده بدأت أعرف درجات الرصاص والفحم وإزاي ممكن أستخدمه في الرسم، وحبيته أكتر وبدأت أستخدمه، وبدأت أخد الرسم كشغل في فترة الثانوية العامة»، بهذه الكلمات بدأت سماح فطيم الزغبي، حديثها لـ«الوطن».
وتضيف «الزغبي»، «شاركت في مسابقات كتير من وأنا لسه في ابتدائي وأخدت شهادات تقدير، وآخر مسابقة كانت في الكلية، وحصلت على المركز التاني، والحمد لله بقيت معروفة دلوقتي بالاسم وناس كتير بتطلب مني إني أرسمهم، وبحاول دايماً إني أطور من نفسي وشغلي بردو، وكمان بحاول أوفق بين الدراسة والموهبة عشان مقصرش في حاجة من الاتنين».
تسعى «الزغبي» دائماً لرسم الفنانين ولاعبي الكرة وعدد آخر من المشاهير، تتابع: «رسمت ناس كتير من المشاهير أبرزهم لاعب فريق باريس سان جيرمان لكرة القدم ليونيل ميسي، وكان نفسي أوصل الصورة له بس معرفتش».
وتستكمل «الزغبي» حديثها: «أسست منذ فترة جروب على موقع التواصل الاجتماعي فيسبوك بعنوان ارسمني بنزل عليه شغلي وبعمل من وقت للتاني مسابقات على الجروب خاصة بالأعضاء لرسم بورتريهات فنية لهم، والحمد لله في تفاعل كبير جداً مع شغلي، وناس كتير بتشير شغلي على مواقع التواصل الاجتماعي، وشايفة نفسي إني إن شاء الله هكون معروفة أكتر أو مشهورة في أقرب وقت ممكن».
تعليقات الفيسبوك