مجسم صغير من صنع وجدي قبل اكتماله
بطريقة غير تقليدية استطاع تطويع الخردة والمواد المعدنية لمشروعه الصغيرة عندما قرر وجدي الغزاوي 27 عامًا من محافظة الدقهلية قبل أشهر أن يجمع المخلفات الصلبة من عشرات الورش في منطقة ميت غمر، ليحولها إلى صناعة لها مكانتها من تجسيد الأشخاص وصنع التحف و«الأنتيكات» فأصبح العديد من الناس يلجأون إليه.
الموهبة التي يمتكلها ابن محافظة الدقهلية تثير اهتمام الأشخاص المترددين على المجسمات بدلًا من اللجوء إلى الرسامين ليصنعوا لهم «بورتريه» فاختار أن يجسدهم بما يجمعه من الخردوات وعلى حد قوله: «الخردة بعمل منها تحف وأنتيكات ومجسمات، وشغلي بيكون عبارة عن تصميمات لحاجات كتير الأشخاص والأبراج والحيوانات، والناس في العادة عايزين حد يرسمهم لكن بحكم شغلي بيجولي عشان أصنع مجسم ليهم».
يستيقظ الشاب العشريني صباح كل يوم قاصدًا عدد كبير من المحلات التي تعمل في مجال إصلاح السيارات والموتسيكلات ليجمع عدد كبير من الخردة، موضحًا: «بنزل كل فترة والتانية عشان أجمع الخردة من الورش الصغيرة بشتري حاجات كتير من اللي بتناسب شغلي زي الصواميل والمسامير وكمان الجنازير، كل الحاجات اللي الصنايعية مش محتاجينها زي بواقي شغل العربيات الموتوسيكلات بشتريها، وكمان أي حاجة بايظة زي التروس وحداوي الأحصنة».
يؤكد وجدي خلال حديثه مع«الوطن» أنه يجمع كميات كبيرة أمامه ويضعها في مساحة على هيئة «أكوام» من الحديد والنحاس وغيرها من المواد المعدنية التي تتحول في النهاية إلى أشكال مختلفة من التحف والانتيكات قائلًا: «الحاجات دي كلها بتتجمع وبحطها قدامي ومحدش بيتوقع إنها هتتحول لتحف وأنتيكات ومجسمات لأشخاص، بشكلها على يدي، وبعمل منها حاجات بتناسب ديكور المحلات والبيوت والمطاعم».
طموح الشاب الذي بدأ مشروعه قبل عام أن يحقق أرباحًا بعد أشهر قضاها في جمع هذه الأشياء إذ يضيف: «رأس مال مشروعي 15 ألف جنيه، ورغم كدا لسة مقدرتش أحقق ربح منه بعد سنة من بداية تنفيذي لفكرتي رغم إني بستغرق وقت في التصنيع، الأسعار مقارنة باللي بتتباع في المحلات الفخمة والمولات تعتبر بسيطة، لكن في النهاية بشتغل الحاجة اللي بحبها، دي موهبتي».
ويحرص صانع الأنتيكات على بيع منتجاته اليدوية بأسعار تناسب زبائنه رغم أنها لا تختلف كثيرًا عن تلك المعروضة بأوجه محلات التحف في العديد من المولات والأسواق بأسعار ثمينة على حد وصفه: «الأسعار اللي حاططها، وأقل من الموجودة في المعارض والمحلات الخاصة بالتحف عندي بتبتدي من 50 جنيها لغاية 350 جنيهًا و500 جنيه وبردو على حسب تكاليف القطعة مثلا اللي 50 جنيها دي عبارة عن موتوسيكل لكن لو سيارة مثقلا بتكون وزنها تلاتة كيلو بتبقى أغلى».
تعليقات الفيسبوك