«سمك وأرز وسلطة».. وجبة مجانية يقدمها مطعم سمك بالجيزة
«الدنيا لسه بخير».. قد تكون هي الجملة الأكثر تعبيرا عما نراه من تنوع وتعدد للأعمال الخيرية التي يقوم بها كل من امتلأت قلوبهم بالرحمة؛ رغبة منهم في تسهيل الحياة على من حولهم، وتذييل مشاقها، ومن هذه الأعمال، إعلان أحد مطاعم السمك بشارع الملك فيصل في محافظة الجيزة عن تقديمه لوجبات مجانية لغير القادرين، من خلال يافطة كبيرة وضعها أمام المطعم.
«إحنا لسه فاتحين المطعم وكنا مقررين من الأول أننا أول ما نفتح هنقدم حاجة لوجه الله.. فيه ناس كتير حالتها صعبة ومش لاقية، وبنحاول نقوم بدورنا تجاه الناس دي»، هكذا حكى «عمر عبده»، 45 سنة، مالك المطعم، في حديثه لـ«الوطن»، وأنه سيستمر في تقديم هذه الوجبات المجانية لكل المحتاجين.
«سمك وأرز وسلطة».. هذه هي محتويات الوجبة التي يقدمها المطعم للفقراء المارين عليه، وتزن قرابة النصف كيلو، على أن يكون السمك المُقدم بها إما من النوع البلطي أو المرجان: «أنا بحط الوجبات قدام المطعم وساعات بتعمد أني مركزش مع الشخص اللي جاي علشان فيه ناس بتكون مكسوفة تاخد وبتبقى فعلا محتاجة، فأنا بسيبهم وببص بعيد علشان مسببلهمش أي إحراج»، بحسب «عمر».
يتراوح عدد الوجبات التي يقدمها المطعم يوميا للفقراء من 25 لـ 30 وجبة وقد تزيد في بعض الأيام؛ حيث أن المحتاجين هم من يحددون عددها يوميا: «فيه ناس بتكون عايزة تاخد أكتر من وجبة.. إحنا لينا نظرة في الشخص، لو كان محتاج فعلا بنسيبه ياخد اللي عايزه، إنما اللي باين أنه مش محتاج بنديله واحدة بس وبنقوله أن الحاجات دي لوجه الله وفي ناس محتاجاها»، وفقا لمالك المطعم، والذي أكد ان تقديمه لهذه الوجبات المجانية لم يؤثر على المبيعات، بل على العكس أدى إلى ارتفاعها.
تعليقات الفيسبوك