الفنان أحمد خليل
استيقظ اليوم عشاق الوسط الفني على فاجعة وفاة الفنان أحمد خليل عن عمر ناهز 80 عامًا، إثر تدهور حالته الصحية، ودخوله أحد المستشفيات، متأثرًا بإصابته بفيروس كورونا المستجد أثناء تصوير مشاهده في مسلسل «إلا أنا» حدوتة «حكايتي مع الزمان».
وتوجد بعض المواقف المحزنة التي يمر بها المشاهير، لذلك نرصد لكم موقفًا تعرض له الفنان أحمد خليل، تسبب في دخوله في نوبة بكاء وانهيار.
تحدث «خليل» عن مرحلة دراسته في معهد السينما، خاصة الموقف الذي تعرض له قبل التخرج وتسبب في دخوله بنوبة بكاء، وذلك في لقاء تلفزيوني سابق مع الإعلامية والفنانة صفاء أبو السعود في برنامج ساعة صفا عبر شبكة قنوات «art» قائلا: «كان بيدرسلي الدكتور علي فهمي، وهو متخرج من لندن وحياته كانت صعبة جدا، لكن في امتحان البكالوريوس، كانوا بيجيبوا دايما ممتحن زائر، فجابوا الأستاذ كرم مطاوع، وكل واحد بيختار الدور اللي عاوز يدخل بيه الامتحان».
وبحسب الفنان الشهير: «أنا كنت بحب ألعب على الشخصيات شديدة الرومانسية، البسيطة، وتعاملاتها مع الإكسسوار، يعني هامليت ده علشان يتعمل صح ده حدوته كبيرة وأنا كنت لسه تلميذ مقدرش على ده، فأول ما قولت للدكتور علي فهمي على اللي هعمله، لقيته بيقول لأ أنا بكرة هجبلك الدور اللي هتعمله».
وفوجئ «خليل» بالمشهد الذي فرضه عليه دكتوره: «مشهد من 3 صفحات، لملك يُثار ضده ويُسجن لمدة 30 عامًا، يحاول الخروج من السجن طيلة هذه السنوات ولكنه لا يستطيع، حتى تحدث ثورة مضادة بعد 30 عامًا، ويخرج من السجن وعمره 80 سنة»، مضيفًا «قولتله لأ يا دكتور أنا أسف ده صعب عليا».
«قولتله أشمعنا انا اللي بتفرض عليا الدور ده، فحصل خلاف بين تلميذ وأستاذه، فقالي هو ده اللي هتعمله، فكنت واقف في الحمام وجنبي الدكتور يحيى عزمي كان وقتها في قسم إخراج، وقالي سمعت أنك أتخانقت معاه، فقولتله ده اتجنن عاوزني اعمل كذا وكذا، ففجأة ظهر وكان بيحاول ميبينش نفسه علشان ميعرفنيش أنه سمع الكلام لكن عيني جات في عينه، فبصلي وقالي: «مش عيب يا ولد قلة الأدب دي ومشي».
ولم يتخيل «خليل»، أن الدكتور «علي» سيمنحه الدرجة التي تؤهله للتخرج كأول دفعته بعد سماع حديثه السيئ عنه، إلا أنه الأخير فاجأه بطلب تعيينه معيدًا معه، وعندما طلبت منه الحديث عن الخلاف السابق، أخبره بالانتظار إلى الغد: «تاني يوم لقيته جايبلي كتاب، قالي المشهد ده اللي أنا دخلت بيه دبلومة في لندن، ولأني كنت بحبك قوي وعارف أنك ممثل كويس جدا، وأنا حابب قوي الدور ده علشان خدت فيه الدبلومة فكنت عاوزك تمثله، أنا طبعا مش عيطت بس ده كان انهيار، وقولتله أنا مكنتش قاصد قالي أنا عارف ومقدر علشان كده محاسبتكش عليها».
تعليقات الفيسبوك