جانب من المبادرة
تمر الأعوام بل والعمر بأكمله، ولا يعرف كثيرون عن وطنهم سوى القليل، معالم غاية فى الجمال وأماكن تستحق الزيارة غائبة عن أذهان المصريين، ما كان سبباً فى إطلاق مبادرة «صورتك فى مصر»، للتشجيع على السياحة الداخلية، وتسليط الضوء على مَواطن الجمال فى البلد العريق.
انطلقت المبادرة بـ«هاشتاج» يحمل نفس الاسم، على موقع التواصل الاجتماعى «فيس بوك»، شارك به مصريون وأجانب، عبَّروا عن انبهارهم بأماكن بعينها، شهيرة أو مغمورة، من بينهم إيمان الباز، القاطنة فى القاهرة: «أماكن كتير جداً فى مصر مش كل الناس عارفينها، ونفسنا نعرفهم بها، ويجربوا زيارتها زينا، خاصة أنها أماكن ممتعة جداً، للكبار والأطفال، ولازم الجيل الجديد يكبر وهو عارف كل أماكن بلده، من باب الترفيه والتثقيف والتعليم، والغريب فى الموضوع إن الأماكن الجميلة دى الناس بتجيلها من برة مصر، وإحنا ما نعرفهاش».
وعن الأماكن التى زارتها «إيمان» بصحبة أبنائها، تقول: «زُرت أكتر من 50 متحف مع أولادى، المتاحف حلوة جداً ورسوم دخولها 5 جنيه بس، ومن الأماكن اللى رُحتها ونفسى الناس تروحها، متحف التحنيط، ومتحف النيل، ومتحف مخصوص بالنوبة، ومن أكتر الأماكن اللى ممكن زيارتها فى شهر 10 هى سيوة، فيها كمية تراث وثقافة عظيمة فايتانا».
شاركت بصورها فى المبادرة الصحفية التونسية فاتن خليفة، بحسب ما روته لـ«الوطن»: «أنا من أمازيغ تونس ورُحت لسيوة للتعرف على أهلنا الأمازيغ هناك، لأننا نفس الانتماء، وهناك لقيت جنة حقيقية على الأرض، المكان والناس والتراث حكاية خيالية، ومن أجمل الأماكن العالقة فى ذهنى معبد وحى آمون، الحقيقة المصريين أغنياء جداً بحضارتهم ومتاحفهم ومعابدهم، وطبعاً زُرت متاحف القاهرة وذهبت لمرسى مطروح فى آخر أيام الجولة فى مصر».
محمد البوردينى، شاب عشرينى يقطن بالقاهرة، شارك فى تفعيل «الهاشتاج» بعدة صور عن رحلته إلى «دهب»: «من أكتر الأماكن اللى بتجننى وما بشبعش منها هى دهب، رحلة من أرخص وأجمل الرحلات، الناس لما بتشوف الصور بتتخض من جمالها وبيفتكروها غالية على عكس الحقيقة، ممكن تقعد أربع أيام إقامة وتروح مطاعم، والرحلة هتكلفك من 700 لـ800 جنيه، وهناك بأجَّر عَجَلة أتفسح بيها طول اليوم، ولو مكان بعيد شوية بركب عربية نص نقل، عشان أتفرج على الأماكن فى الطريق، وأكتر الأماكن فى دهب راحة نفسية بالنسبة لى البحيرة الساحرة».
يواصل «محمد» حديثه عن رحلته: «أجمل مكان تعمل فيه سفارى فى دهب هو وادى جونى، بتدخل الصحراء بالبيتش باجى، وتمشى فى وسط جبل، لحد ما توصل لمحمية وادى جونى، بتطلع فوق الجبل، وتبص عليها من فوق، وتشرب أحلى شاى بالمرمرية هناك، كمان بعشق جبل الطويلات بالليل، بيبقى فيه حفلات ممتعة جداً، مهما أحكى مش هقدر أوصل إحساسى وأنا هناك».
تعليقات الفيسبوك