محمد عامر
منشور على مواقع التواصل الاجتماعي انتشر كالنار في الهشيم، مرفقا بصورة لحارس مدرسة يُهرب طالبا من أعلى السور، ما أثار غضب جمهور السوشيال ميديا، بسبب ما ادعاه المنشور من أن حارس المدرسة الذي يُدعى «عم شوقي»، يساعد الطلاب على الهروب من فوق سور المدرسة، مقابل «2 جنيه للطالب، و5 جنيهات للمدرس».
الحقيقة على عكس ما ادعى المنشور، فالشخص الذي ظهر في الصورة التي أثارت ضجة منذ أمس، هي لشاب من محافظة الأقصر يُدعى محمد عامر، وبسبب هذه الصورة وقع في مشكلة كبيرة يحكيها لـ«الوطن»: «أنا بقدم محتوى على اليوتيوب بعمل اسكتشات كوميدية، والفيديو اللي انتشر ده مش حقيقي، أنا كنت عامل فيديو بسيط عشان ابنى اتأخر على المدرسة، وروحت معاه عشان أدخله، وعملت الفيديو ونشرته على النت، والناس خدت الصورة من الفيديو ونشرتها وكتبت إن أنا حارس مدرسة وبهرب العيال، وباخد مقابل ده 2 جنيه، والكلام ده كله مش مظبوط، وعملي مشاكل كتير».
تخرج «عامر» في كلية الحقوق ويعمل حاليا في شركة إلى جانب عمله «يوتيوبر» يقدم محتوى مرئيًا كوميديًا، من خلال «شخصية عم شوقي»: «الدنيا مقلوبة من امبارح، والنهارده الصبح الناس بتكلمني وبيجيلي رسايل على الواتساب، بيخوفوني وبيقولوا لي الموضوع وصل لوزارة التربية والتعليم، وفيه شكاوى ومحاضر وقضية، الحاجة الوحيدة اللي مخوفاني، إني أتعرض للمساءلة القانونية، أنا معملتش حاجة غير إني صورت فيديو بالموبايل».
وأوضح «عامر» أنه ليس له علاقة بكل ما أثير على مواقع التواصل الاجتماعي، ويدعو رواد السوشيال ميديا إلى التوقف عن نشر صورته حتى لا يتعرض إلى مشكلة: «أنا مبشتغلش فراش، والكلام ده كله مش حقيقي، الناس عملتلي حوارات من لا شيء».
تعليقات الفيسبوك