حلوى المولد في علب «آركيت»
علب من خشب «الآركيت» المزخرف، تستعرضها المحال في موسم المولد النبوي، لتزخر بأصناف الحلوى وتزيدها بهاءً، ويختارها الزبائن الراغبون في منحها كهدايا قيّمة للأهل والمعارف، بعيدًا عن العلبة الكرتونية المعتادة.
بسعادة وحماس أقبل كريم جلال، على رصّ علب الحلوى الخشبية في «دكانهم» بأحد أزقة منطقة وسط البلد، ويتابعه الزبائن الذين جذبهم شكلها الأنيق، ويسألون عن أسعارها بكل ود وفرحة؛ احتفالًا بروحانيات الموسم.
«العلب دي قيّمة جدًا بتجيلنا من مصنع في مدينة بلبيس بمحافظة الشرقية، بتبقى أقيم وأشيك من العلبة التقليدية، وزباين العلبة دى كتير يعنى مثلًا لو واحد خاطب وعايز يدخل على خطيبته وفي إيده حاجة شيك ومميزة تفرّحها»، بحسب حديث «جلال» لـ«الوطن».
وعن تصنيع وإنتاج تلك النوعية من العلب، يروي الشاب الثلاثيني أنها صناعة مصرية، تأتي للمحل من أحد مصانعهم في محافظة الشرقية: «إحنا اللى بنصنّعها، هي عبارة عن أبلكاش، وواحد متخصص بيصممها بالكمبيوتر، ويكتب عليها الكلمة اللى محددينها، ونحط النقشة المناسبة، وتتنفذ على الخشب نفسه، بيبقى كله حفر ليزر، وفي الآخر بتطلع بالشكل النهائى، كأنها فعلًا معمولة يدوى».
وعن أسعار علب حلاوة المولد «الآركت»، يقول «كريم»: «الأسعار بتبدأ عندى من 45 جنيه، فيه علب بـ55 وعلب تانية بـ65 فما فوق، وهي مطلوبة جدًا في السوق، وبتطلب منى كتير وببيعها طول الموسم، ومصنع الشرقية متخصص في العلب دى، وبمجرد ما موسم مولد النبى بيخلص، بنقفله ويشتغل السنة الجاية في الموسم».
بعض الزبائن يظنون أن علب الحلوى الخشبية مصممة يدويًا «هاند ميد» بأحجامها وأشكالها المختلفة، وفقًا لـ«كريم»، بسبب شكلها المميز الجذاب، على غير الحقيقة، حيث تنفذ آليًا بمهارة وحرفية شديدة: «هي فعلًا تحفة فنية، وبنصح الزباين دايمًا يشتروها ويهادوا بيها أحبابهم».
تعليقات الفيسبوك