ميرنا
روت ميرنا فتحي، محاربة السرطان والحاصلة على 84% في الثانوية العامة، تفاصيل انتصارها على المرض الخبيث ونجاحها في الثانوية خلال عام واحد فقط، قائلة: «أول لما خفيت من المرض حاولت أخرج من المود ده عشان أعرف أكمل حياتي وأحقق حلمي، وفترة الثانوية كانت صعبة عليا، لأن كنت بدأت آخد التطعيمات بتاعتي الخاصة بالسرطان، فكان بيحصل بعض المشكلات في النص بس الحمد لله كنت بقدر أتجاوزها عشان ماما كانت معايا».
وأضافت «ميرنا»، خلال لقاء ببرنامج «مصر تستطيع»، المذاع على شاشة قناة «dmc»، ويقدمه الإعلامي أحمد فايق، اليوم، أنها كانت تضع هدفا بالحصول على مجموع كبير في الثانوية العامة للالتحاق بالكلية التي ترغب بها: «الحمد لله جبت نتيجة كويسة وهدخل ألسن، الثانوية كانت مرحلة صعبة، بس ربنا بيعوضني وبيفرحني عشان صبرت قبل كدة واللي أنا عديته».
وتابعت: «قعدت سنة ونص من غير شعر، الخروج من تجربة السرطان له آثار نفسية كتير أوي، وفي نفس الوقت كنت فاتحة كتب الثانوية العامة وبذاكر، بس مش بحب أقف عند نقطة معينة، لأن لو وقفت مش هكمل حياتي ومدرسيني شجعوني أكمل، والدكتور الخاص بيا نصحني مكملش الثانوية السنة دي، بس دخلت عشان أثبت لنفسي إن مفيش حاجة هتوقفني».
ووجهت رسالة لشقيقها الذي كان يساندها ويشجعها طوال فترة علاجها، قائلة: «ربنا يخليك ليا، دايما مفرحني ودايما في ضهري، وبحبك أوي أوي، أغلى حاجة في حياتي».
من جانبها، قالت جيهان حمدي، والدة «ميرنا»، إنّها تثق في الله في تخطي ما أصيبت به ابنتها: «هو ابتلاء بس أنا على يقين إن ربنا هيشيله، هو اختبار من ربنا لينا، وأي حاجة في حياتنا بتبقى فيها اختبارات فهي قالتلي السنة دي أنا هقاوم أي حاجة».
كان برنامج «مصر تستطيع» استضاف «ميرنا» في حلقة بتاريخ 23 أغسطس 2019، روت خلاله رد فعلها حين علمت أنها أصيبت بمرض السرطان، حيث قالت خلال التقرير: «كانت صدمة كبيرة جدًا لما عرفت إني مريضة سرطان، وأهلي مكانوش مبلغيني لكن الدكتور اللي قالي على الخبر، وكانت صدمة كبيرة بالنسبالي إنه يبقى عندي سرطان في سن صغير».
تعليقات الفيسبوك