حذر الشيخ خالد الجندى، عضو المجلس الأعلى للشؤون الإسلامية، من الاستهانة بالنشر على مواقع التواصل الاجتماعي، مشيرًا إلى أن هذا الأمر قد يتسبب فى دخول الجنة أو النار، «اللى هتنشره هيتضاعف سيئات من تطاول أو صورة عارية، أو نهش فى أعراض، أو الإساءة لأهل القرآن، لو حققت ٢ مليون مشاهدة يعنى ٢ مليون سيئة فى رقبتك».
وأضاف «الجندي»، خلال تقديمه برنامج «لعلهم يفقهون»، الذي يُعرض على شاشة «DMC»: «الناس يوم القيامة لما تشوف اللي داخل النار هتسأل ده مين، هيقولوا ده فرعون، طب جاي في إيه؟ هيقولوا جاي في إدعاء الإلهية، طب وده مين هيقولوا ده أبو لهب، جاي في إيه، هيقولوا كفر بالله، ودول مين هيقولوا قوم لوط، جايين في إيه، في شذوذ».
وتابع ضاحكًا: « الناس بقى هتسأل، طب وده مين، هيقولوا ده هيثم ابن طنط شادية، جاي في إيه؟ جاي في نت، أه هيقولوا جاي في نت وهيقف مع أبو لهب وفرعون، جريمته أنه بيشير وداخل في لجان الشتيمة وسوء العمل والقيام بعمل كفر على النت ونهش أعراض على النت وقصف محصنات، تطاول على الغيب، زنا على الانترنت، النميمة».
وتابع: « استخدموا التليفون في الأدعية والآيات القرآنية، متقوليش أنا صغير والعمر لسه قدامى، لا العمر يضيع فى ثانية، وانتوا شوفتوا لاعب المنتخب الدنماركي كان هيروح في ثانية»، موضحًا أن الموبايل قد يتسبب في دخول النار بشكل كبير، بسبب كثرة الفاحشة التي تُكتب عليه.
تعليقات الفيسبوك