شيماء البهي
قالت الدكتورة شيماء البهي، خبيرة علم الأعصاب والإتيكيت، إن البعض يتخيل أن السعادة تأتي عندما ينتظر الشخص شيئا ما يحدث لكي يكون سعيدًا، ولكن يجب أن يأخذ الشخص قراره بأن يكون سعيدًا، وذلك عن طريق بعض الخطوات التي لابد أن يفعلها المرء، وعلى رأسها الابتسامة.
وأضافت «البهي»، خلال لقاء ببرنامج «أتوبيس السعادة»، المذاع على شاشة قناة «dmc»، ويقدمه الإعلامي أحمد يونس، أن الابتسامة تعتبر صدقة، وعلم الأعصاب يشير إلى أن الشخص مرآة للشخص الذي أمامه، فإذا ابتسم هذا الشخص بشكل طبيعي سيبتسم الذي أمامه، «حتى لو مكشر بردو هيضحك».
وتابعت: «المسؤول عن دة فيه شبكة أعصاب في المخ تسمى الشبكة العصبية المرآتية، ودي بتخليني لا إراديا بقلد اللي قدامي، لو هو أتاوب أنا هتاوب، ونفس الكلام لو ضحك هضحك، الابتسامة مُعدية، ولو ضحكت الشعور لا إراديا هيجيلي».
وواصلت: «فيه هرمونات تخليك سعيد، فيه نوع يخليك مبسوط حاليا واللي في إيدك، ونوع تاني تخليك تبص لقدام ودة مهم بس مهم ميضحكش عليك ويخليك تبص لحاجة صعبة أو تخليك تاخد طريق مش حلو، ولازم يكون فيه سيطرة، والرضا في اللي ربنا كتبهولك بيخليك سعيد، لازم تصحى الصبح وتكتب النعم اللي ربنا أخدهالك في ورقة الصبح، لو مشينا بما يرضي الله هنقدر نخلي مخنا سعيد».
واستكملت: «فيه حاجات بنعملها مش صح أو ممارسات خاطئة بتخلينا نحس بسعادة دلوقتي حالا بس بعد كدة بتضرنا زي أكل الحلويات والسكريات، لأنه بتعلي الأنسولين مرة واحدة، ولما يعلى في الدم، لكن بعد كدة السكر بيقل مرة واحدة، فنحس أن الطاقة نزلت مرة واحدة، يفضل الشخص في دايرة مفرغة، وتعتبر سعادة زائفة ومضرة بالقلب والسكر والسمنة».
وتابعت: «ممكن نعمل شوية تبديل، بدل ما آكل شوكولاتة عادية، ممكن استبدلها بالشوكلاتة الداكنة، بس اي زيادة منها مش كويسة، كمان عين الجمل بيزود القدرات العقلية والتركيز وهرمونات السعادة، والكافيين اللي في القهوة أو الشوكلاتة الداكنة بتشتغل في منطقة بالمخ اسمها المكافئة، ربنا خلق عندنا سيستم بكافئ به نفسي».
تعليقات الفيسبوك