كابوريا وجمبري بالوايت صوص..وجبات فاخرة مجاناً للفقراء: خليهم يتفسفروا
الاهتمام بالأسر الفقيرة والأيتام أول أولوياتها، لذا تحرص على تقديم وجبات مجانية فاخرة، حتى وإن كانت مكلفة، بهدف إطعامهم من أصناف لم يتذوقوها من قبل بسبب سعرها الباهظ.
هكذا قررت جيهان جمال، مسؤول أحد المطابخ الخيرية، بمنطقة الهانوفيل في العجمي التابعة إلى محافظة الإسكندرية، أن توزع وجبات «كابوريا وجمبري وطواجن سبيط بالوايت صوص» على الفقراء.
ووزعت «جيهان» 50 وجبة كابوريا وسبيط وجمبري بالمكرونة على الأسر الفقيرة، وذلك بعد إعداد حصر للأسر المستحقة للدعم: «في أسر فقيرة مش بتشوف الجمبري ده نهائي ولا تعرف طعم الأسماك الغالية دي عاملة إزاي، ومن حقها إنها تاكل، وعشان كده قررت أنا وباقي المتطوعين، إننا نعمل وجبات إحنا بنقدر ناكلها في بيتنا واختارنا نعملها بطريقة حديثة وشيك» بحسب «جيهان».
وبالفعل كانت هذه الوجبات أول مرة يتذوقها الفقراء في حياتهم، وهذه الوجبات يتم إعدادها داخل مطبخ خيري تابع لـ«جيهان»، ويتم تعقيمه وتنظيفه بشكلٍ جيدٍ حتى لا تنتشر أي عدوى بين هذه الأسر: «كل اللي بيعملوا الأكل بيكونوا لابسين كمامة طبية وواخدين بالهم من نفسهم ونضافتهم كويس، عشان مايبقاش فيه فرصة لنشر فيروس كورونا بينا ونعمل الخير بتاعنا من غيرما حد يتعب مننا».
وتحكي «جيهان»: «الأسر الفقيرة زهقوا من الرز والفراخ اللي باقي الجمعيات الخيرية بتوزعها عليهم وحبينا نكون مختلفين ولمسنا ده منهم وإحنا بنوزع عليهم الوجبات عينيهم كانت بتنط من الفرحة».
ورصدت «جيهان» سعادة هؤلاء الأسر وفرحتهم بتناول وجبات فاخرة وجديدة على بطونهم: «دي كانت أهم حاجة بالنسبة لنا أننا نفرحهم»، وبعد أن وجدت هذه الفرحة وعدتهم «جيهان»، بأن تقوم بتوزيع هذه الوجبات بشكل دوري: «معروفين إننا بنعمل وجبات في رمضان وطول السنة ومش مرتبطين بوقت أو عيد معين.. إحنا هدفنا أن الناس الغلبانة تاكل وتنبسط».
تعليقات الفيسبوك