لقطة من موقف التورتة المحرج
أثار فيديو تظهر فيه ضيفة بأحد البرامج المذاعة على إحدى القنوات الفضائية وهي تحاول تناول «تورتة» عيد ميلادها بفمها دون استخدام الشوكة أو المعلقة، موجة سخرية واسعة على مواقع التواصل الاجتماعي، خلال الساعات الماضية، كما رد عليها المذيع بطريقة ساخرة.
وظهرت الفتاة في الفيديو، وهي تحاول تناول التورتة بفمها، ليرد عليها المذيع: «إيه ده إنتي بتعملي إيه، إنتي مكلتيش تورتة في حياتك قبل كده»، لترد: «مش عارفه أكلها بالسكينة»، ليرد المذيع: «إيه شغل الفول الحراتي ده».
وتواصل «الوطن» مع صاحبة الموقف المحرج، وتدعى سارة البدوي، وهي خريجة إعلام جامعة القاهرة، وقدمت بعض الحلقات في إحدى البرامج بالقناة، وتُعد صديقة شخصية للمذيعين بالقناة، وطلبوا منها أن تحضر كضيفة في البرنامج كمفاجأة لها في يوم عيد الحب، الذي يوافق يوم عيد ميلادها أيضًا: «هما حبوا يهادوني في عيد ميلادي بتورتة ففاجئوني على الهواء بيها».
«لا كان فيه شوكة ولا ملعقة لتناول التورتة، فاضطريت أتصرف بتلقائية، فحملت التورتة وقربتها من فمي وبدأت أكلها» بحسب «سارة»، مشيرة إلى أن «الحلقة كانت طويلة جدًا وكنت عاوزه أكلها كلها في الحلقة، فاتصرفت بتلقائية، مفيش شوكة قدامي ومش هعرف أكل بالسكينة عشان هبهدل نفسي».
وتحكي «سارة» كواليس الموقف المحرج، حيث قال لها المذيع بعد أن قطع الحلقة بعد الموقف بفاصل إعلاني «إنتي ليه مش كيوت زي البنات رغم إن شكلك جميل».
تقول «سارة»: «لما قالي كده زعقت معاه وقلت له إني كنت عاوزه أكل التورتة وكمان عندي حاجة مهمة بعد الحلقة فمش هقدر أستنى أكلها بعد الحلقة».
سعادة كبيرة شعرت بها سارة، بعد تداول الفيديو بشكل كبير على مواقع التواصل الاجتماعي: «مبسوطة إني ضحكت الناس كلها، وناس كتير بعتت لي رسايل وشكرتني على الفيديو وإني ضحكتهم».
وعلق العديد من رواد مواقع التواصل الاجتماعي على الفيديو قائلين: «إنتي بتعملي إيه يا سارة»، «إيه اللحوسة دي»، «يا نهار أسود على التلقائية اللي بتودي صاحبها في داهية»، «هي حطت نفسها في موقف محرج بس المذيع أحرجها أكتر وملمش الموضوع».
تعليقات الفيسبوك