عُرف بخفة ظله، وجسم رياضي، وقوامه القوي والممشوق، فبمجرد ظهوره على الشاشات يترك بصماته بين المشاهدين بالأدوار التي يؤديها، وتظل محفورة في الأذهان وربما يستخدمها الكثير من مواقع التواصل الاجتماعي بشكل مستمر في «الكوميكسات».
وبمجرد ظهور الفنان أحمد التهامي منذ أيام على جروب « Health Keepers» الشهير باتباع الأنظمة الصحية، وبدأ المتابعين يتفاعلون معه بشكل كبير ويحصل على آلاف التعليقات والإعجاب.
وتواصلت «الوطن» مع الفنان أحمد التهامي ليحكي عن الجانب الصحي والرياضي، والأنظمة التي يتبعها بشكل يومي وفيديوهاته الرياضية ونصائحه التي يقدمها بشكل كوميدي والتفاعل الكبير من مستخدمي مواقع التواصل الاجتماعي هذه الأيام.
«الناس لطيفة الواحد بيلعب ويهرج معاها أنا بتابع السوشيال ميديا كويس والجروبات المحترمة لاقيت جروب محترم والناس بتساعد بعضها فشاركت فيه»، هكذا بدأ أحمد التهامي حديثه موضحًا أن ما جذبه في جروب «هيلث كيبرز» أن أعضاءه يتحدثون بكل مصداقية ويشاركون ويشجعون بعضهم: «قولت أدخل معاهم في الجروب أعمل روح مرح وبهجة الحمد لله الناس رد فعلها كان عالي وحلو مكونتش متخيل ده وطبعا احنا بنهزر».
ومن أبرز المنشورات التي ينشرها «التهامي» على الجروب على سبيل المثال «الفطار رغيف سن مع قطعه جبنه قريش الغذاء ربع فرخه مشوية وسلطة ونص رغيف سن، العشاء علبة زبادي عليها لمونة ملحوظة: ده الأسناك اللي بين الوجبات» ما أثار نوع من المرح والكوميدية على المتابعين وتهافتوا بالتعليقات، كما أنه نشر صورة له أمامه طبق طعام ويطلب من الناس إزالته ووضع طعام صحي وغيره من المنشورات التي يريد من خلالها إضفاء روح من البهجة عليهم.
التهامي يعتمد على طريقة الـ «لايف ستايل» في نظام غذائه
وبصوت يملأه الضحك وحبه للجمهور قال التهامي: «أنا سعيد إني معاهم وربنا يقدرني على فعل الخير واظبط لهم الدايت»، أما عن نظامه الغذائي اليومي فهو عبارة عن طريقة يطلق عليها «لايف ستايل» أو «أسلوب حياة» وهو ما يسير عليه الفنان بخلاف طرق الدايت أوالرجيم التي تحتوي على الحرمان: «أنا مبعترفش بحاجة اسمها دايت ورجيم ده ممكن يتعمل للناس اللي هما مش بيلعبوا رياضة أو زيادة في الوزن كبيرة لازم يمشوا على دايت».
واستكمل التهامي حديثه: «الموضوع دلوقتي مختلف ممكن تاكلي أكل صحي خالي من الدهون والملح والحلويات والمياه الغازية وممكن ياكلها بس بتوازن وبشكل سنوي مش كل يوم، أنا ميزان نفسي ودرست تغذية واخدت كورسات كتير فيها وقرات أكتر فبظبط لنفسي الأكل حتى لو لغبط ملغبطش اللغبطة اللي تبوظ الدنيا»، بحسب وصفه.
الرياضة في حياة الفنان أحمد التهامي
أما بالنسبة لممارسة الرياضة فهي جزء أساسي في حياته اليومية ووصفها أنها مهمة جدا ليس من أجل الشكل الخارجي فقط بل للصحة الداخلية: «الرياضة تأثيرها بسيط في الشكل الخارج لكن تأثيرها قوي جدا على الصحة الداخلية ولكن الشكل الخارجي اللي بيتحكم فيه نظامك الغذائي، ميعاد تمريني يوميا الساعة 3 وده أسلوب حياة، أسيب اللي ورايا وادخل الجيم عشان ببقى عصبي جدا لو مدخلتش ومش هعرف اتكلم مع حد».
ولا يحب «التهامي» أن يزعجه أي شخص في ميعادين الأول أثناء ممارسته الرياضة الأمر الذي يجعله يختار مكان مغلق عليه هو فقط من أجل التركيز في التدريب والثاني أثناء الوجبة التي يتناولها بعد التمارين الرياضية: «بعد كده اعمل أي حاجة حتى في وقت التصوير بيبقوا عارفين أن في تمارين لو مزنوقين بأجله بليل، لأني ببقى مضايق جدا ومش مركز لو معملتش كده».
أحمد التهامي: أنا شخص جدي عكس اللي متعارف بي
وكشف التهامي لـ «الوطن» أن طريقة شخصيته جادة وصارمة عكس المتعارف عليه أنه كوميدي فقط قائلا: «الكوميديا شيء والحياة شيء، في جزء من الهزار والضحك بس الواحد مش كده في حياته طول الوقت وأنا نادر الظهور والخروج وحياتي وسط أسرتي وعندي حيوانات عايشة معايا طيور وكلاب ببقى مبسوط وانا قاعد معاهم وبحبهم جدا».
أحمد التهامي يقدم فيديوهات رياضية
ويقدم التهامي عبر حسابه بموقع «فيسبوك» فيديوهات له أثناء ممارسة الرياضة من أجل مساعدة المتابعين الذين ليس لديهم مدرب في الصالة الرياضية، على معرفة الطرق الصحيحة لاستخدام الأجهزة وكيفية أداء التمارين: «عشان الناس تفهم عشان بيقى في ناس مش عارفة بحاول أساعد عشان ميحصلش إصابات».
أما عن النظام الغذائي الصحي الذي يتبعه، شرح «التهامي» أنه كما سبق ذكره يستطيع التنظيم لنفسه ما يتناوله بشكل يومي موضحًا أنه لديه مقولة له يفضلها كثيرا «(الرجيم مش دايت وحرمان الرجيم أكل وإدمان) يعني أنا مدمن حلويات بس باكل اللي نفسي فيه بس بكميات بسيطة ومش على طول يعني الواحد لازم يأكل صحي ومفيد».
نصائح التهامي الصحية للمتابعين
ونصح «التهامي» الناس بتناول أكل صحي ومفيد مثل الخضار والسلطة، واستبدال الدهون المركبة لدهون مفيدة مثل المكسرات: «الواحد مينفعش يحرم نفسه الحرمان شيء خطأ جدا يخلي في دبلان في الجسم والوش المفروض الواحد يأكل كل 3 ساعات يعني وجبات صغيرة تتحسب ومتبقاش فيها دهون وتستخدمي كربوهيدرات مهم جدا الرز والشوفان والبطاطس المشوية أو المسلوقة و البطاطا ولازم البروتين».
كميات الطعام في فيلم التجربة الدنماركية
وتحدث «التهامي» عن فيلم «التجربة الدنماركية» بطولة الفنان عادل إمام، وعن مشاهد الأكل فيه الذي كانت تحتوي على كميات كبيرة جدا حيث مزح قائلا: «والله الواحد زمان كان يقدر ياكل كده وفي طاقة لكن دلوقتي لأ صعب جدا».
واعتاد الفنان في الصباح على تناول البيض الأومليت بدون الصفار ويمكن استخدام الزيوت الخالية من الدهون أو تسويتها على طاسة لا يلصق فيها الأكل ويفضل تناول الشوفان كـ«سناك» حتى يشعر بالشبع لمدة طويلة: «المهم طول الوقت نسبة السكر في الدم ثابتة لا تقل ولا تعلى عشان منحسش بالجوع».
ونصح «التهامي» بزيارة طبيب التغذية إذا كان الشخص ليس له خبرة في هذه الأمور حتى يستطيع معرفة ما يحتاجه جسمه ثم بعد ذلك يمكن يحدد أسلوب حياته بشكل دائم.
وأشار أحمد التهامي إلى أن دور الشخصية في العمل الفني هو الذي يحدد مظهره الخارجي: «الدور بيفرض عليا عايز إيه، اخس شوية ولا اظبط نفسي ولا» موضحًا أنه لا يفضل تناول الطعام خارج المنزل لذلك يجلب معه الطعام والمياه خلال التصوير، وكشف لـ «الوطن» أنه يشارك في مسلسل من المنتظر عرضه في رمضان المقبل وكذلك في فيلم قريبًا.
وتذكر «التهامي» وقت الحظر في كورونا وماذا كان يفعل حينها وقت غلق الصالات الرياضية: «كان عندي أجهزة رياضية خفيفة في البيت طبعا كنت عاملها مناشر للهدوم في العادي، بس بدأت اشيل واشتغل عليها وأجري في الجنينة وشوية تمارين صغيرة».
أبناء الفنان أحمد التهامي
وتحدث الفنان عن أبناءه «مصطفى وخديجة» حيث إنه أحيانا يصطحبهم معه في الصالة الرياضية ولكنه لا يزعجهم في اختيار الأطعمة: «سايبهم يعيشوا حياتهم زي الأطفال يلعبوا ويشربوا وياكلوا مش هقولهم لايف ستايل بس أهم حاجة الرياضة وهما بيلعلوا تايكوندوا وبيحبوا التمثيل وطلعوا مع مي عز الدين قبل كده في مسلسل البرنسيسة بيسة وبيمثلوا في المدرسة».
تعليقات الفيسبوك