نصب على التليفون
في مكالمة مباشرة «لايف» مدتها 7 دقائق، استطاعت تغريد الجمال، من أبناء مدينة المنصورة بمحافظة الدقهلية، فضح أحد النصابين، الذي استغل اسم إحدى شركات الاتصالات الشهيرة زاعما أنه يعمل بها، وحاول النصب على الفتاة واستدراجها للحصول على رقم حسابها البنكي، بحجة أنها حصلت على هدية مالية بمبلغ 3 آلاف جنيه، وأنه سيقوم بإيداع المبلغ في حسابها.
وكانت طريقته غير مقنعة وحجته ضعيفة ومكشوفة، مما جعلها تكشفها بسهولة وتفضحه.
«أول ما قلت له أنا طلعت المكالمة بتاعتك بالرقم اللي متصل بيا منه لايف على الفيسبوك قفل في وشي وقفل الرقم لأني اتصلت به كتير إداني مقفول»، بحسب «تغريد» التي تعرضت لأكثر من مرة لعمليات نصب عبر التليفون وإلكترونيا أيضا، إلا أن هذا الفخ الذي حاول أحد النصابين نصبه لها كان مبتذلا للغاية.
وقالت: «أسلوبه كان باين إنه مش موظف خدمة عملاء أبدا، ولما طلب مني رقم الحساب قلت له: مش معايا. قال لي: طب أي حد، جوزك أو ولادك. قلت له: مش معانا، ولو في هدية ابعت لي على رقم حسابي بتاع الخط بتاعي طالما إنت شغال في نفس الشركة بتاعت الخط بتاعي. قال لي: لا يا فندم مينفعش دي هدية بيبعتوها رجال الأعمال ومش بتدخل الشركة دي (من بره بره) وكانت حجة متدخلش دماغ عيل صغير خالص».
وبدلا من أن ينصب لها فخا، نصبت له «تغريد» فخا أكبر، من خلال خروجها «لايف» على «فيسبوك» بمكالمته، وأظهرت رقم تليفونه للجميع حتى يحرصون منه ولا يقعون فريسة لشباك نصبه، «فضل معايا على التليفون يقنعني إن لازم أبعت له رقم حساب، وأنا أقوله مش معايا، وهو يصر إني لازم أبعت له رقم حسابي البنك ويقول لي الهدية هتروح عليكي، وفضلت أحيره عشان أعرف آخره، وأقوله: إن هاقول لخدمة العملاء إزاي أتصرف في موقف زي ده عشان أخد هديتي، فرد وقال لي لا يا فندم إوعي تتصلي عشان دي هدية من رجال الأعمال مالهمش دعوة بيها، ولما عرفته أن فضحته قفل في وشي على طول».
ووفقا لـ«تغريد» بدأت المكالمة بإرسال رقم «كود» وبعدها اتصل بها وبدأ في رواية حكاية النصب التي أراد من خلالها الإيقاع بها.
تعليقات الفيسبوك