صورة أرشيفية
وائل المصري صاحب معرض تأجير سيارات بمدينة كوم حمادة في محافظة البحيرة، استطاع أن يضرب مثالاً للشهامة والمروءة، بعد إنقاذه لـ«توكتوك»، سُرق من قبل لصين قاما بالاحتيال على صاحبه وسرقته ثم فرا به، ورغم أنه عرض أسرته إلى خطر شديد، لكنه لم ييأس، وخرج مسرعا بسيارته خلف السارقين حتى قطع عليهما الطريق وسلمهما إلى الشرطة، وأعاد التوكتوك إلى صاحبه.
«كنت مسافر أنا ومراتي وابني، رايحين القاهرة، واتفاجئت بتوكتوك قدامي، وجنبي عربية نص نقل، فيها واحد جنب السواق، عمال يقول الحقوني سرقوا مني التوكتوك، فهمت أنه بتاعه، وسرعت وراء التوكتوك وفضلت أحجز عليهم، وأقطع الطريق علشان ألحقهم، وهما خوفوني وطلعوا من العربية حديدة كبيرة، وفضلوا يخبطوا في العربية، ويضربوا في كل حتة عشان أخاف وأسيبهم، بس أنا مسكتش وفضلت بجري وراهم»، بحسب «وائل»
وقد ساعده في الإلحاق بالسارقين، سائق سيارة نصف النقل وسائق آخر لسيارة «لوري»، وقطعوا جميعهم الطريق على السارقين: «وبعد كده مسكناهم بصراحة أنا من غلي ضربتهم وصاحب التوكتوك واقف بيترعش من الخوف والصدمة اللي هو فيها وفضل يقول لي انا غلبان وده أكل عيشي أنا وولادي ولو كان راح مني كنت هموت فيها وفضل يشكرني».
وبحسب «وائل»، استغرقت هذه المطاردة 30 دقيقة، وحدثت خسائر لسيارته: «الاكصدام اتكسر والجوانب كلها اتطبقت لجوه والكبوت كمان وأنا هصلحهم على حسابي ومطلبتش من صاحب التوكتوك حاجة ده راجل غلبان الله يعينه»، وحرص «وائل»، على تصوير هذه الواقعة بهاتفه حتى تكون عبرة لأي سارق يحاول الاستيلاء على مال غيره: "أنا حتى وإحنا بنضربهم وماسكينهم بنسلمهم للشرطة تعمدت أني صورهم عشان ميكرروش ده تاني ويتفضحوا ويكونوا عبرة لأي حد يفكر يعمل كده».
تعليقات الفيسبوك