مهرجان "أيجى نالية" فى ليلة رأس السنة ختامها نوبى
الخروج من حالة القلق والتوتر التى تسببها أنباء انتشار فيروس كورونا، والتأكيد على أهمية الحفاظ على الثقافة والتراث النوبى، كان هو هدف فريق "اشيرجو" النوبي من خلال تنظيم حفلة في ليلة رأس السنة أطلقوا عليها مهرجان "أيجى نالية".
"أيجى نالية معناها بالنوبى "تعالوا شوفونا"، والحفلة هدفها الأساسى دعم جهودنا فى إحياء التراث النوبى، ونشره بين الشباب مش بس النوبى أو اللى بينتموا لجنوب مصر، لكن بين الشباب العادي من القاهرة والمحافظات المختلفة، فاحنا بنقول للناس تعالوا شوفونا واتعرفوا علينا، واخترنا ليلة رأس السنة علشان تكون علامة على التفاؤل والأمل فى انتهاء الخوف من فيروس كورونا والسيطرة عليه خصوصا أن سنة 2020 كانت صعبة على الكل كما يقول محمد سمير مسئول الفريق عن فكرة المهرجان.
الالتزام بإجراءات التباعد الاجتماعى والوقاية من انتشار فيروس كورونا، كان على أولويات "سمير" وزملائه خلال تنظيم الحفل، الذى سيقام فى إحدى الفلل فى منطقة المريوطية: "اخترنا الفيلا لأنها مكان مفتوح، وحطينا شروط للحضور، وهى أنه يكون الدخول بالكمامات، وكل واحد معاه مطهر إلى جانب توفير مطهرات للناس مجانا برضه، والأهم من ده كله، أننا خلينا المكان يستقبل ربع العدد فقط، فالمكان ممكن يستقبل 2000 فرد، لكن عدد الناس المسموح بدخولها لا يتخطى الـ450 فرد، وده التزاما بتعليمات وزارة الصحة".
تتنوع فقرات الحفل ما بين الغناء والرقص النوبى، إلى جانب إتاحة معرض للمنتجات النوبية "الهاند ميد"، وقال سمير: "اتفقنا مع 3 مغنيين من النوبة وأسوان، بحيث أننا نمثل جنوب مصر من أول سوهاج لغاية أسوان، والغنا بأكتر من لهجة مش النوبية بس، علشان محدش يزهق أو يمل، وفتحنا الباب للناس اللى بتعمل منتجات يدوية أنهم يعرضوا مشغولاتهم فى الحفلة، علشان يكون فى جانب تسويقي داعم للثقافة النوبية والمشغولات اليدوية بشكل عام، اللى بنتمنى أنها تنتشر من تانى، لأنها تراث فنى وحضارى عريق يشرف مصر وأبنائها".
تعليقات الفيسبوك