أسماء مع كلبها فلافي
كانت في قمة سعادتها وهي بجانب الكلبة "فلافي" التي يتعلق بها قلبها، لا تسطيع الذهاب إلى أى مكان بدونها، وبينما ترتسم الضحكة على شفتي أسماء عبد الفتاح، موظفة في شركة خاصة، وهى تداعب كلبتها على كورنيش الإسكندرية في منطقة الشاطبي، فجأة وجدت نفسها محاطة بـ10 أشخاص من الحى يطالبونها بسداد غرامة، لعدم ارتداء الكلب الكمامة رغم تحذيرات محافظة الإسكندرية -حسب قولها-.
شد وجذب لم يستمر طويلا، قرر بعده هؤلاء الأشخاص اصطحاب الكلبة لعدم وجود رخصة أو شهادة تطعيمات مع صاحبتها، وهو ما أصاب "أسماء" بالانهيار: "خدوا مني فلافي، وحطوها مع كلاب تانية في العربية ومشيوا، خدت الاسكوتر بتاعى ومشيت وراهم، ساعتين كاملين بلف وراهم لحد ما البنزين خلص، وكلمت حد من أهلى وجالى ورحت ورا فلافى ماسبتهاش".
في الوحدة البيطرية في خورشيد، حاولت "أسماء" سداد الغرامة وأخذ كلبتها، لكنهم رفضوا وطلبوا منها الحضور في اليوم التالي، إلا أنها أصرت على أخذها، مؤكدة أنها لن تتركها لحظة واحدة: "خدوا منى غرامة 1400 جنيه، عشان الكلبة كانت معايا بدون الكمامة والرخصة وشهادة التطعيمات".
تكمل: "مكنتش أعرف إن مطلوب مني أمشى بكل الحاجات دى، طبعا لو كنت سبت الكلبة وسط الكلاب الكتير اللى هما واخدينها من صحابها مكنتش هشوفها تانى، لأن في الآخر الكلاب دى بتتباع في مزاد علنى، لأن الوحدة البيطرية ماتقدرش تأكل كل العدد ده".
وعبر صفحتها على "فيسبوك"، وجهت "أسماء" نصيحتها لمحبى ومربي الكلاب في الإسكندرية: "خلوا بالكم، ماتمشوش من غير رخصة الكلب والكمامة ودفتر التطعيمات، لازم الـ3 عشان مبقاش فيه ذرة رفق بالحيوان، الكلاب بعد ما بتتاخد بـ5 أيام بتتعرض في مزاد، والكلاب اللي مابتتبعش بتتضرب بالنار عشان هما هيأكلوها منين، طب مادام مش هتعرفوا تأكلوها بتاخدوها من صحابها ليه؟".
واشتكت "أسماء" من أن العاملين في الوحدة البيطرية، يتعنتون مع أصحاب الكلاب، وأحيانا يرفضون الاعتراف بالتطعيمات التي يأخذها الكلب في عيادة خاصة: "خلوا بالكم كمان مش معترفين بأي دفتر تطعيمات غير تطعيمات الحكومة، يعني حتى لو بتروح تطعم عند دكتور خاص هيتلككوا على الموضوع ده وهياخدوا الكلب برضه".
مشاهد صعبة تتذكرها "أسماء" لحظة أخذ الكلب منها: "كل ما أفتكر البيه اللي كان بيرفعها في العربية، كان ماسكها من الطوق اللى في رقبتها وعلقها في الهوا، كان هيخنقها ويموتها"، مشيرة إلى أنهم كانوا يريدون تحرير محضر ترويع مواطنين ضدها، لكن خالها تدخل ودفع إيصال الغرامة باسمه حتى لا تكون هناك أى مسائلة قانونية خاصة بابنة شقيقته.
تختتم صاحبة فلافي: "الكلب اللى معايا جولدن، وده معروف أنه هادى جدا ومش شرس، يعنى عمره ما ينطبق عليه مقولة ترويع المواطنين، في ناس تانية بتشرس كلابها وبتمشى فيها في الشارع، ودول محدش بيقدر يتكلم معاهم".
تعليقات الفيسبوك