حفل خطوبة بمحل ذهب ببولاق
طريقة جديدة ومبتكرة اتبعها محمد حنفي صاحب محل ذهب بمنطقة بولاق الدكرور، لمساعدة العروسين في توفير نفقات تأجير قاعات المناسبات خصوصا في ظل ارتفاع أسعاها، وأيضا لجذب الزبائن.
"محمد" قرر تخصيص مساحة داخل المحل، لتكون قاعة مناسبات، ويقيم فيها حفلات خطوبة للعروسين بعد شرائهما الشّبكة، ويقوم بإهداء العروس باقة ورد، ويحرص على تشغيل أغاني المهرجانات الصاخبة، مع توزيع "بيبسي وقطعة جاتوه"، كما يشجع العروسين على الرقص معا وكأنهم داخل قاعة مناسبات حقيقية: "بدأت في تنفيذ الفكرة من وقت أزمة كورونا والقاعات قفلت والأسعار دلوقتي بعد ما فتحت عالية ويا دوب العريس بيجيب الذهب بالعافية وحفل الخطوبة دي هدية مني للعروسين"، بحسب "محمد"، وتستقبل القاعة 10 أفراد بخلاف العروسين: "المكان يشيل أكتر بس عشان التباعد الاجتماعي كدة أفضل وميبقاش فيه زحمة ويرقصوا براحتهم"، وتستغرق الحفل مدة تتراوح بين 30 دقيقة وساعة، وفقا لرغبات العروسين.
ويقيم "محمد" حفلتي خطوبة أو ثلاثة على الأكثر: "العرسان اللي بييجوا لي المحل بيبقوا مبسوطين جدا وبيحس أنه فرح خطيبته فعلاً والناس هنا في منطقة شعبية كلهم عارفين بعض وبنفرح لبعض"، ووفقاً لـ "محمد": بشغل لهم الأغاني الشعبية اللي عايزينها، بيفرحوا ويتبسطوا من غير ما يدفعوا جنيه واحد، أنا بعمل ده لوجه الله عشان الناس تفرح وتتبسط، خصوصاً في الظروف اللي إحنا فيها دي"، ويقوم "محمد" بتوثيق هذه اللحظات من خلال تصويرها فيديو وصور.
يرفع "محمد" شعار "اشتري الشبكة والفرح علينا"، ويقول: "بضرب لهم صاروخ الزينة اللي بينزل ورق بيلمع على العروسين وهما بيلبسوا الدبل عشان أشاركهم فرحتهم"، وبحسب "محمد"، يقدم خدمة أخرى للعروسين "الشبكة الاقتصادية" عبارة عن دبلة ومحبس وخاتم بأسعار تتراوح بين 5000 جنيه و 5500 جنيه وفقا لحجم الذهب: "الباكيدجات دي لها أكتر من شكل وكل عروسين بيختاروا الشكل والأوزان اللي يفضلوها".
تعليقات الفيسبوك