أثار الحدوتة الجديدة من مسلسل "إلا أنا"، "ربع قيراط"، الذي يعرض على قناة "dmc"، من بطولة الفنانة ريهام عبدالغفور "منى"، ومصطفى درويش "أحمد"، صدى واسعا بين المشاهدين وتعاطف جمهور السوشيال ميديا، مع الزوجة بسبب تعرضها لخيانة زوجها، بزواجه من خطيبته السابقة، وعدم تقديره لتضحياتها وتنازلاتها عن حقوقها ورفاهيتها، وهو ما دفع بعض أصحاب الخدمات والأنشطة التجارية إلى تقديم خصومات لأى زوجة يحمل زوجها اسم "أحمد" كنوع من استغلال شهرة المسلسل.
مركز تجميل يقدم خصم 15٪
استغل مركز تجميل شهرة المسلسل وقدم خصما يصل إلى 15% على أحد منتجات مزيل العرق للسيدات المتزوجات بـ"أحمد".
تضحيات وتنازلات كثيرة تقدمها السيدات المصريات بهدف دعم أزواجهن خلال مشوارهم العملي، حتى يصحبوا رجال أعمال ناجحين أو موظفين مجتهدين، إلا أن هناك بعض النماذج تقابل هذه التضحيات بالخسة والخيانة، وهذا النموذج منتشر بين أسر كثيرة، منهن من تثأر لخيانتها، وهناك من ترضى بالأمر الواقع، بحسب أحمد أبو الفتوح، مسئول مركز التجميل.
وأضاف: "الست المصرية شقيانة على بيتها وولادها ودايماً ناسية نفسها وحياتها الخاصة وأغلب الوقت تلاقيها مبهدلة في نفسها وقليل لما بتلاقي شكر أو راجل يرد لها الجميل بالعكس ممكن يطعنها ويخونها بمنتهى السهولة لأن أغلب الرجالة طماعة ونكران جميل وده اللي أثار تعاطفنا مع المسلسل، وعشان كده قدمنا خصومات تصل لـ 15% لأي ست جوزها اسمه أحمد تقدر تشتري منتج مزيل وده مش معناه أن أحمد جوزها خاين لكن ده على سبيل الهزار وفي نفس الوقت دعاية لينا وأرباح وكمان الستات هتستفاد".
ووفقاً لـ "أحمد"، زادت مبيعات المركز بنسبة 10% أضعاف المبيعات اليومية: "اتبسطت جداً أن الفنان مصطفى درويش تفاعل معانا على السوشيال ميديا وعمل شير للخصومات اللي قدمناها للستات".
كشف مجاني في عيادة أسنان
"أي ست جوزها أو خطيبها اسمه أحمد ليها يوم الجمعة كشف مجاني وخصم 50% على التنظيف وتلميع الأسنان"، هكذا تضامن الدكتور محمد أشرف، طبيب أسنان، مع السيدات بعد عرض المسلسل الذي كسب تعاطف الجمهور وخاصة السيدات: "فيه نسبة كبيرة جداً من السيدات المتزوجات بتعاني مع أجوازهم مش بيصونوهم ولا بيحفظوا كرامتهم وأول ما ربنا يكرمهم بيبصوا بره ويروحوا يتجوزوا والمسلسل ظهر ده بنسبة كبيرة رغم أنه موجود حوالينا طول الوقت، والكشف المجاني ده دعم مني للست المصرية الشقيانة".
مصطفى درويش: متعاطف مع الستات
وقال الفنان مصطفى درويش لـ"الوطن": "المسلسل عن قصة حقيقية وقعدت مع البطلة الحقيقية للمسلسل عشان أعرف حجم المأسي اللي اتعرضت لها والوجع عشان أقدر أقدم الدور بالشكل اللي يخلي الجمهور يتعاطف معها فعلاً، والنماذج دي موجودة كتير جداً حوالينا وقابلتها وفي الراجل اللي بيدخل على مراته ومتجوزة واحدة تانية ولا كأنه عامل حاجة".
وبعد رد الفعل القوي للمسلسل، شعر مصطفى درويش بفرحة وفخر أنه استطاع تقديم نموذج للمشاكل الأسرية الموجودة بنسبة كبيرة بالمجتمع: "استنوا في نهاية المسلسل هيكون في رسالة بنوصلها للستات والرجالة واللي بتروح تخون ستاتها ولازم يقدروا مراتتهم ويحترموهم ويصونوهم دول أمانة"، ولُقب مصطفى درويش بين جمهور السوشيال ميديا بـ "مصطفى أبو حجر"، وهذا لا يسبب له إزعاجاً بل دليل على النجاح.
تعليقات الفيسبوك