تصميم وصناعة حذاء أو "شبشب" تستغرق 30 دقيقة فقط، هذه أول نصيحة يقدمها جمال طلعت، صاحب مركز تعليم حرف يدوية في القاهرة والإسكندرية، من خلال تنظيم "كورس" تعليم صناعة الأحذية والشباشب من الجلد الطبيعي، لمدة 10 أيام.
وبحسب "جمال"، فإن "تعلم أنواع الجلود والصبغة والدباغة، واستخدام الباترون والتصميم فوقه والخياطة"، مهارات يتعلمها المشاركون بالكورس: "كل حاجة تخص الحذاء أو الشبشب من أوله لآخره بيتعلموه في الكورس إزاي يقدروا يختاروا القماش المناسب ويوفقوه مع التصميم والشكل اللي بيتم تنفيذه والخياطة بشكل متناسق، بحيث متبقاش مبتذلة وكل حاجة بتبقى عملي بيشتغلوا بإيديهم من أول يوم لهم في المركز عشان إيديهم تاخد بسرعة ويبقى سهل"، ومدة المحاضرة 3 ساعات يوميا، وأحيانا يتم إعادة الكورس مرة أخرى للراغبين في زيادة خبراتهم العملية لصناعة الحذاء.
ولا يشترط "جمال" الانضمام لهذه الدورات فئات أو أعمار محددة: "الكورس بيكون فيه شباب بنات وناس كبار في السن، ونسبة منهم بتبقى عايزة تفتح مشروع جديد لها في صناعة الأحذية، وفي بعض منهم الكورس بالنسبة لهم هواية حابين يمارسوها ويصنعوا لنفسهم".
ووفقاً لـ "جمال"، هذه الدورات تساعد في مواجهة الأسعار المرتفعة للأحذية: "أي حذاء سعره مستحيل يزيد عن 100 جنيه مهما كان شكله والقماش المصنوع منه، والمحلات بتغلي الأسعار عشان احنا اللي بنعملها الصيت ده و90% من المحلات بتستغل الصيت وترفع الأسعار بحجة أنها براند، رغم أن الحذاء ممكن يتعمل في أي مصنع حتى لو على الأيد وبنفس الجودة، المهم اللي يتعلم يقدر ينفذ".
وبحسب "جمال"، تحتاج صناعة الأحذية إلى ذوقٍ راقٍ ومختلف، بالإضافة إلى صبر وثبات حتى يتم إنتاج حذاء متين وله شكل يتناسب مع الموضة الحديثة، مؤكدًا أن الكورس يساهم في نشر ثقافة الإقبال على المنتج المحلي، الذي يمتاز بجودته، وهناك إقبال شديد من المواطنين للمشاركة في الكورس وتعلم هذه الحرفة.
تعليقات الفيسبوك