في زمن الكورونا تعاني الأسواق من حالة من الركود، وهذا العام هو أول عام يشهد تخفيضات "البلاك فرايدي" مع انتشار فيروس كورونا، ويحاول عدد من التجار جذب الزبائن لتحريك المياه الراكدة منذ فترة خلال هذا الموسم.
"الرزق يحب الخفية"، شعار رفعه الكثير من التجار وأصحاب المحلات، فبالرغم من أن تخفيضات "البلاك فرايدى" أو ما يطلق عليه "الجمعة البيضا" فى الدول العربية، معروف أنها تكون آخر يوم "جمعة" خلال شهر نوفمبر، إلا أن هؤلاء التجار قرروا بدء موسم التخفيضات مبكرا، واستغلال شهر نوفمبر من بدايته، فى تقديم العروض.
"كورونا آثرت على عمليات البيع والشراء، وبالتأكيد فكرة أننا نبدأ من أول الشهر تقديم التخفيضات مقصودة لتحريك المياه الراكدة زى ما بيقولوا" حسبما يؤكد حازم طاهر، صاحب محل لبيع لعب الأطفال فى منطقة الهرم، إذ أعلن "حازم" عبر صفحة المحل على الفيسبوك على بداية تخفيضات "الجمعة البيضاء" منذ أول جمعة فى شهر نوفمبر، والتى تبدأ من 25% وتصل أحيانا إلى 75%.
حازم طاهر
يعتبر "حازم" أن التخفيضات هذا العام ستكون مختلفة عما سبق لأنها ستكون أكبر، وليس مجرد تخفيضات بسيطة: "الناس مش بتنزل من بيوتها علشان خايفين من الإصابة بكورونا، فأنا كتاجر لازم أحاول أقدم له إغراءات علشان ينزل، ويبدأ يشتري من عندى وده فى الغالب هيكون من خلال التخفيضات الكبيرة اللى تكون حقيقية مش وهمية".
عمار مصطفى مسئول مبيعات فى محل للملابس الرجالى فى منطقة "المقطم"، أشار إلى أن المحل بدأ عروض الجمعة البيضاء منذ بداية الشهر، كنوع من الدعاية للمحل، ورواج لمنتجاته وسط الشباب: "هدفنا إننا نوصل لأكبر عدد ممكن من الزبائن، مش بس فى منطقة المقطم لكن فى مناطق تانية، كمان فى هدف تانى وهو إننا نخلى العميل يستفيد بأكبر قدر من الخصومات، يعنى لما تكون الخصومات فى يوم محدد هيكون فى زحام، وممكن ميعرفش يشترى كل اللى هو عايزه، لكن على مدار شهر هيقدر الزبون أنه يشترى أكتر من قطعة ويستفيد بالخصم عليها".
"دعاية لأن الشراء من المصنع يكون فى المواسم فقط" بهذه الكلمات وصف محمد عبد الباقى مسئول تسويق ومبيعات فى مصنع لبيع ملابس العمال، سبب تفضيل مسئولى المصنع بدء موسم تخفيضات "الجمعة البيضا": "التخفيض اللى إحنا عاملينه 10%، وهو مش قليل ومش كبير برضه، والهدف منه ببساطة بطاقة تعريف للمصنع للوصول لزبائن أكبر، والمقصود بالزبائن هنا، المحلات التجارية لأننا بنبيع بالقطعة بس الأكثرية من شغلنا بيكون للمتاجر والمحلات، وعلشان كده التخفيضات دى بتوصلنا لشرايح تانية، وعلشان كده بدأنا بدرى، لضمان وصولنا لأكبر عدد ممكن من الناس".
تعليقات الفيسبوك