انتشرت لعبة بابجي على العديد من التليفونات المحمولة في الآونة الأخيرة، فهي لعبة مفضلة للعديد من المستخدمين، يلعبها الجميع من طفل لا يتعدى عمره 10 سنوات، إلى شاب تخطى الـ30 عامًا، يجلس أمامها الأطفال برفقة أصدقائهم بالساعات، بل وصل الأمر إلى حد إدمانها وعدم قدرة مستخدميها على تركها، إلى أن أدت إلى وفاة بعض من مستخدميها حول العالم، كان آخرها وفاة طفل منتحرًا في محافظة الشرقية بسبب مطالبة أسرته له بعدم الإكثار منها وتركها، بالإضافة إلى شخصًا بسكتة قلبية أثناء اللعب نتيجة ارتفاع الأدرينالين المفاجئ في جسمه.
15 ساعة متقطعة كان يقضيها "يوسف أحمد" أمام لعبة بابجي، بواقع 6 ساعات متواصلة دون انقطاع، يأخذ فترة قصيرة من الراحة ثم يعود إلى اللعبة مرة أخرى، ووصل به الأمر إلى حد إدمانها.
يقول يوسف: "كنت بلعبها 15 ساعة في اليوم، في الأول تعبت من القعدة الكتير وأنا بلعبها، فكنت باقوم أعمل أي حاجة وممكن أرجع أكمل لأن القعدة الكتير متعبة، بس بعد كده بدأت واحدة واحدة أقلل عدد الساعات، لأن الجيم الواحد بقى بياخد وقت أطول والواحد زهق، في البداية كنت باتعب من اللعب وبيجيلي إرهاق، بس بدأت أتعود".
يوسف: بلعبها 6 ساعات متواصل.. ياسر: بتجبلي صداع
من صغره وهو معتاد على قضاء وقتاً طويلاً أمام الألعاب، مؤكداً أن حالات الانتحار والوفاة بين الأطفال بسبب بابجي سببها قلة الإدراك لدى الأطفال: "الأطفال مش واعيين بحاجة وممكن يفكروا في أي حاجة غلط وهما مش مدركين، فاللي حصل للأطفال يرجع للطفل نفسه وبتبقى أسباب شخصية، معظم اللي بيلعبها معتبرها زي السوشيال ميديا".
محمد ياسر، 14 عامًا، يقضى من 5 لـ7 ساعات متقطعة يوميًا داخل لعبة بابجي، ينهر زميله في الفريق، ويتعصب بسبب موته في اللعبة، ويعيدها مرة أخرى متوعدًا بالفوز.
وأوضح "ياسر" سبب حبه للعبة: "بابجي بتدخلك في مود مع أصحابك غريب، بتهزروا مع بعض وتنافسوا بعض، وبتدخل عالم تاني كله هزار ولعب، بتنسى العالم الواقعي، وبتتعرف على ناس جديدة".
"صداع، أرق، وتعب في الجسد"، آلام مر بها "ياسر" أثناء اللعب، جعلته يقوم بتقليل عدد ساعات اللعب: "قررت إني هاقلل منها، بس إنك تسيب طفل أكتر من 5 ساعات، والموبايل في وشه ده هيتعبه، ومفيش حد بيوجهه".
وأكد "ياسر"، أن غضب الأطفال وتأثرهم الكبير باللعبة نتيجة الخسارة أو محاولة الأسرة إبعاده عن اللعبة: "لما بتخسر في اللعبة بتخسر حاجات كتير وبتخسر تعب يومين عشان توصل لمستوى معين، لما بتخسر بتنزل في المستوى كتير، ده غير التنافس الكبير بين الناس اللي فيها واللي ممكن طفل ياخد الموضوع على أعصابه".
لعبة بابجي، هي لعبة جماعية وبقاء، حيث يدخل فيها 100 شخص مجتمعين في خريطة محددة من خرائط اللعبة، يمكن أن تلعب بشكل فردي أو تلعب مع فريق، عند الانطلاق يبدأ جميع اللاعبين بدون أسلحة وأحياناً بدون ملابس، ثم توجب عليك الهبوط في منطقة محددة لتجمع الذخيرة والأسلحة والملابس وكل ما يقابلك لتبدأ بذلك مشوار اللعبة وتواجه الأعداء.
تعليقات الفيسبوك