«النحاس» مع تمثال الحصان
«أخشاب وجذور ومفصلة»، أدوات اعتمد عليها الفنان التشكيلى محمد النحاس لإخراج تحفة فنية لمجسم حصان خشبى، تسارع الجميع إلى التقاط الصور التذكارية معه، قبل أن يقرر عرضه للبيع بمبلغ 60 ألف جنيه.
«الحصان عملته من سنة لما طلبه منى شخص خليجى»، يتحدث «النحاس» عن فكرة التمثال: «كان جايلى عن طريق وسيط وبيسأل عن قدرة المصريين على عمل حصان خشب زى اللى عامله فنان عالمى فى إيطاليا والبالغ ثمنه 160 ألف دولار».
رغبة «النحاس» فى إثبات قدرات الفنان التشكيلى المصرى دفعته لقبول التحدى فى البداية قبل الاختلاف معه فى المكالمة الثانية: «رشحت له اتنين غيرى الأول لكن هو أصر إنى أعمله، بس ماتفقناش، كان عاوزنى أسافر ليه زيارة شهر علشان أعمله هناك، وطبعاً رفضت».
بدأ الفنان التشكيلى مهمته التى استغرقت 3 أشهر، ليتمكن من إخراج التمثال بطول 3.20 متر، وعرض متر، ليكون قادراً على حمل ثلاثة أشخاص، معتمداً فى عمله على العديد من أنواع الأخشاب، منها الفنلندى الذى صنع منه الشاسيه الأساسى للحصان، وعمودين من الكولاج، بالإضافة إلى تجميع عدد كبير من قطع خشب التوت البرى بدون نحت، وهو الأمر الذى زاد من صعوبة المهمة.
وبحسب «النحاس»: «فيه فروق اتعملت بين الخشب ماكانش ينفع تتعالج بالغراء أو المواد الكيميائية، فجبت جذور شجر الجوافة، وعملتها كأوردة دموية للحصان، ولما احتجت أعمل شعر الحصان وديله جبت له خشب الحنة، لأنه لما بيتنقع فى الميّه لمدة 10 أيام بيبقى زى الخيط».
نقل «النحاس» التمثال بواسطة لودر: «جبت لودر ينقله عند بحيرة البرلس فى كفر الشيخ قدام البيت كمنظر طبيعى، وتهافت البعض على التقاط الصور التذكارية معه، ولكن قمت بإرجاعه للمخزن الخاص بعملى»، وعرضه بسعر 60 ألف جنيه: «اللى بيسمع السعر بيتخض».
تعليقات الفيسبوك