إبراهيم "بائع الفريسكا" رفقة خاله وأحد الباعة في المحل
بعد انتشار فيديو إبراهيم عبدالناصر، طالب الثانوية العامة الذي حصل على مجموع 99.6% ويعمل كبائع "فريسكا" على إحدي شواطئ الإسكندرية، حاولت إحدي فروع شركة ملابس جاهزة بالإسكندرية الوصول إليه تليفونياً لتقديم عروض خاصة له في محاولة لدعمه، ولكن محاولاتها بائت بالفشل، ليفاجأ مسئول فرع الإسكندرية بقدوم "إبراهيم" مع والده لشراء ملابس من فرع الشركة بالصدفة.
يروى إسـلام أحمد، مدير فرع الشركة بالإسكندرية: "اتصلنا عليه كتير بس تليفونه مغلق، بعدين تفاجئنا إنه من بين الزباين الموجودين في المحل، وكان معاه خاله، كانت صدفة غريبة، بس انبسطنا بيه، وفي زباين كانت موجودة انبسطت بوجوده واتصوروا معاه".
عرض ليس له مثيل، قدمته الشركة لـ"إبراهيم" جعلته في حالة خجل، خاصة مع كثرة زبائن المحل الذين التفوا به: "عملنا له في الأول خصم من 50 لـ70% على الحاجات اللي اشتراها، وبعدين قدمنا له كوبون بـ3000 جنيه يقدر يشتري بيهم أي هدوم من فروعنا المختلفة كل سنة، ولو المبلغ خلص وحابب يشتري تاني في أي وقت، هانعمله خصم 50%، ولو حابب خصم أكبر هانعمله، والزباين كانوا بينقوا له هدوم على مزاجهم، كان خجول جداً وفي قمة السعادة".
اجتهاد "إبراهيم" وتفوقه، كان الدافع الذي حركهم لتقديم الهدية والدعم له، ومحاولة منهم لإسعاده، وتسهيل حياته الجامعية: "إبراهيم مجتهد وجايب مجموع مرتفع في الثانوية العامة وماستعرش من شغلانته، دي حاجة نفتخر بيها، وهو يستاهل أكتر من كده، ومش عاوزين ناخد منه فلوس كتير".
تعليقات الفيسبوك