رحلة العام الماضى لأوائل الثانوية العامة
احتفالاً بأوائل طلاب الثانوية العامة، قررت بعض الجمعيات الخيرية فى محافظة دمياط، وشركة سياحية فى مدينة المنصورة، تنظيم رحلات صيفية للإسكندرية ودهب وشرم الشيخ، لمدة تتراوح بين يوم و3 أيام مجاناً، تشمل الإقامة ومصاريف الانتقال وجلسات تصوير على الشواطئ.
بادر أحمد علاء، مسئول جمعية خيرية فى دمياط، بتنظيم رحلة لمدة يوم إلى الإسكندرية، لأوائل طلاب الثانوية بمختلف المحافظات: «هدف الرحلة إننا نشجعهم على التفوق أكتر، مش بس التفوق الدراسى كمان فى حياتهم الشخصية أو العملية بعد كده، وتشجيعهم للحفاظ على نفس الأداء والتميز»، مؤكداً أن الرحلة ستكون يوم الجمعة المقبل، ويشمل برنامجها زيارة أماكن عديدة منها قلعة قايتباى، مكتبة الإسكندرية، المعمورة، الكورنيش، رحلة بحرية: «هنعزم الطلاب على آيس كريم وحلويات شرقية زى الهريسة اللى إسكندرية مشهورة بيها، هيبقى يوم مميز زى يوم نجاحهم».
هدية أخرى، قدمتها إحدى الشركات السياحية فى المنصورة، حيث تنظم رحلة إلى شرم الشيخ لمدة 3 أيام لأوائل الثانوية العامة: «هنتكفل بكل حاجة من أول المواصلات لحد الفسح اللى هنعملها هناك، وهنزور دهب وهنعمل كامب، ودى مكافأة مننا عشان نجاحهم وتفوقهم، وكمان فرصة إننا نسوق للشركة ونزود حجوزاتها، خصوصاً بعد فترة من الركود عانينا منها مؤخراً»، بحسب مصطفى عبدالفتاح، مسئول التسويق بالشركة.
وتعد هذه هى المرة الثانية التى تنظم فيها الشركة رحلات مجانية لأوائل الثانوية، حيث نظمتها العام الماضى كحافز للطلاب وتشجيعهم على الاستمرار فى التفوق.
تعليقات الفيسبوك