النساء يقبلن على شراء الذهب رغم ارتفاع أسعاره كمحاولة للاستثمار فيه
الارتفاع الجنونى لأسعار الذهب، واقتراب عيار 24 من ألف جنيه للجرام الواحد، دفع بعض السيدات إلى توجيه استثمارهن للذهب، خاصة مع الأنباء المتداولة عن استمرار ارتفاع سعره فى السوق العالمية، مع تراجع الدولار أمام اليورو.
الاستثمار فى الذهب، تفكير منطقى اهتدت إليه أسماء على، من مدينة بنها فى القليوبية، خاصة بعد انتشار تحذيرات على مواقع التواصل الاجتماعى، بأن أسعار الذهب ستشهد ارتفاعاً آخراً خلال الفترة المقبلة: "بتابع أسعار الذهب كل يوم، وبدخل على صفحات باعة الذهب، ولقيت فى معظم التعليقات ناس بتحذر من بيع الدهب لأنه هيرتفع تانى الفترة اللى جاية، بسبب البورصة على مستوى العالم وفيروس كورونا".
زيادة أسعار الذهب 10 جنيهات، بعد يوم واحد من متابعة "أسماء" لتلك التحذيرات، دفعتها لشراء حُلى بمبلغ 14 ألف جنيه: "خفت معرفش اشترى تانى لو وصل لـ1000 جنيه للجرام، فقلت اشتريه ويكون عندى وسعره يزيد أحسن ما أحوش الفلوس دى وتبقى قيمتها زى ما هى".
لا يمثل الذهب بالنسبة إلى منى إسماعيل، موظفة فى أحد المصالح الحكومية بشبرا الخيمة، مجرد حلي ترتديها فى المناسبات العائلية والأفراح فقط، بل مشروع استثمارى لشراء شقة ابنها الصغير، لذا أسرعت إلى شراء عدة جرامات من الذهب بعد أن قفز سعر الجرام إلى أكثر من 900 جنيه: "ابنى فى سنة تانية جامعة، ولازم أشيل قرشين عشان لما يتخرج أقدر أساعده فى انه يتجوز أو يفتح مشروع، ومفيش إلا الدهب، سعره مضمون وفى الزيادة، علشان كده بدأت من 5 سنين كده اشترى دهب كل ما يكون معايا فلوس".
تعتمد "منى"، على شراء الذهب المستعمل توفيراً لـ"المصنعية": "بعد ما اشتريت الذهب على طول اتفاجئت أن سعره وصل إلى 850 جنيه عيار 21، و930 جنيه عيار 24".
وأرجع عبد الكريم فتحى، صاحب محل ذهب فى الدقى، سبب ارتفاع أسعار الذهب بهذا الشكل الجنونى، إلى فيروس كورونا: "العالم كله خايف، مفيش شغل ولا بيع وشرا، والفلوس فى البنك قيمتها بقت بتقل كل شهر مش كل سنة زى ما إحنا متعودين، فالناس فى العالم وخصوصا الصين بقوا يلجأوا للدهب كاستثمار آمن، وهو ده اللى الستات بتعمله فى مصر بالفطرة، وحاليا بقيت أشوف رجالة كمان بتعمله".
وفر سمير محمود، صاحب محل لبيع الذهب فى محافظة القليوبية، لزبائنه خدمة شراء وبيع الذهب المستعمل، مدركاً إقبال السيدات عليه بكثافة: "الفترة دى ستات كتير اشتروا من عندى دهب مستعمل وحتى جديد، وكانت فكرتهم أنهم يلحقوا يخزنوا قبل ما يوصل سعره لـ1000 جنيه، وبالتالى ممكن يبعوه ويكسبوا فيه كويس".
تعليقات الفيسبوك